Shillong, K’lyngkot 6 : U President ka Congress Vincent H Pala ha ka sngi Nyngkong, ula kyntu ban leh phikir bha halor ka kaiphod ka Expert Committee on Meghalaya Reservation Policy, haba maham ba ka Sorkar ka dei ban bud ia ki lynti kiba dei ban leh hashuwa ban pynbna paidbah ia kino kino ki jingai jingmut.
“Nga tharai ba hadien ba ka Exepert Committee kala aiti ia ka kaiphod halor ka State Reservation Policy, ka Sorkar ka hap ban iasyllok bad hadien kane kan sa wanrah hapoh ka Iingdorbar. Kam lah ban shu pynlong paidbah kumto” ong u Bah Pala.
Ula batai ia ki rukom leh haba iadei bad kum kine ki kaiphod bad ong “Ka ju dei ka rukom ba haba phi thung ia ka Commission, ngam tip kaba kumno kata ka rukom treikam ki leh hangne hynrei lada dei ha ka Sorkar Pdeng, nyngkong kin hap ban iakren hapoh ka Sorkar, kino ki jingai jingmut ba ka pdiang bad kano kaba kyntait bad hadien kin sa iatai hapoh ka Iingdorbar Thaw Ain bad dei hadien kane ba kila lah ban pynlong paidbah”.
U Bah Pala ula pynpaw ia ka jingkyllain bha kane ka kam, haba pynpaw ba ka kaiphod ka don haduh 4000-5000 sla bad ka lah ban don shibun ki jingktah.
“Kan shim por ia ka Sorkar ban bishar bniah ia ka kaiphod ba 4000-5000 sla. Kam dei ka kam kaba suk. Naba kane ka dei ka kam kaba kyllain bha bad kaba lah ban pynmih ia kino kino ki jingjia kumba jia ha Manipur, Jammu & Kashmir, Bangladesh. Ha Bangladesh, ka daw hi ka dei ka Reservation. Kumta, ka Sorkar ka dei ban bishar bha bad rai la kan pdiang ne kyntait” ula pynpaw.
Ula bynrap ba ka jingiakren ha ka Sorkar kan donkam ban hap long phikir bha shuwa ban shim rai khnang ban kiar ia kino kino ki jingjia ki bym itynnad. “Nga tharai, ka Sorkar kan shimpor namar kane ka kam ka long kaba kyllain bad kaei kaei ka lah ban jia ha kano kano ka por”.
Ha ka 19 tarik Nohprah 2025, u Myntri Rangbah ka Jylla Conrad K Sangma ula kular ba ia ka kaiphod jong ka Expert Committee on the State Reservation Policy, kaba khia haduh 200 kilo bad ba don haduh 4000-5000 sla, yn sa pynlait paidbah shen.
Ha kajuh ka por, ka Sorkar kala bthah ia u Chief Secretary bad kiwei ki heh Ophisar ka Jylla ba kin bishar bniah ia man ki kyntien bad man ki sla jong ka kaiphod ka Expert Committee bad ban aiti ia ka kaiphod sha ka Sorkar.
