Guwahati, Rymphang 08: “Ka Sorkar Assam kan nym ai satia ia kano kano ka jaka sha ka Meghalaya” ong u Myntri ka Border Protection and Development ka Assam u Atul Bora ha ka Dorbar Mang tyngka jong ka Assam ha ka sngi Balang.
Ha ka por ba ki jingiakren ki dang iaid hapdeng ki ar tylli ban pynbeit ia ki jingiakajia khappud ha ki hynriew tylli ki jaka bym pat iapynbeit, ka Sorkar Assam kala kren shai ba kan nym shet kylla ia ka jingsngew jong ki paidbah Assamese.
U Myntri Sorkar Atul Boro ula ong ba ki ar tylli ki la jam shakhmat da kaba shim ia ki jingpynsngew na ki nongshongshong jong ki Jylla ba iakajia bad kumjuh ruh na ki bor pyniaid District ki arliang mamla.
Haba jubab ia ki jingkynnoh u MLA ka Sivasagar Akhil Gagoi ba ka Sorkar Assam kala shu iehnoh iala ka hok halor ki jaka da kaba aiti noh sha Meghalaya, u Atul Boro ula ong “Kam mih satia ka jingkylli ban aiti noh ia ka jaka ka Assam sha Meghalaya”.
Ka donkam ban kdew hangne ba ka Assam bad Meghalaya kila iatakhuh ia ka jingiakajia pud ha ki 12 tylli ki jaka kaba don haduh 884.9km. Hynrei, ki artylli ha u 2022, kila iasoi ia ka soskular ha ka jingiadonlang u Myntri kam Pohiing ka Ri Amit Shah ha Delhi, ban pynkut noh ia ki jingiakajia ha ki 6 tylli ki jaka.
Na ka 36.79 sqkm ki jaka iakajia bala iakren ban iapynbeit ha ka kylla ba nyngkong ha ki 6 tylli ki jaka, ka Assam kala ioh 18.46 sq km bad ka Meghalaya kala ioh 18.33 sq km.
