Shillong, May 29: U Myntri ka sorkar jylla uba khmih ia ka kam jngohkai u Bah Paul Lyngdoh hynne ka sngi Palei ula ong ba ka Sohra ka dei ka jaka jngohkai kaba pawnam bad kaba shngain watla kala don ka jingjia kaba dang shen ba ki shijur kila jah klep.
“Ka jingtuid ki briew sha Sohra ka pyni shai kdar ba ngi don ia ka jinglong jingman kaba biang ha ki sawdong sawkun jong ka kam jngohkai. Ki Hotel, Resort bad ki Homestay kila dap smam,” ong u Bah Paul Lyngdoh haba kren ha kaba iadei bad ka jingshngain ha katei ka thain.
Ula kubur ia ka jingjah jong kitei ki shijur hynrei ula ong pat ba kawei ka jingjia kan ym lah ban shu khein kyllum salonsar shaphang ka jingshngain. “Ngim lah ban buh ia ki pulit ha man la ki shi inshi jong ki jaka jngohkai”ula ong.
Ula ai nuksa da kaba ong “U Briew uba na Shillong ula jah klep hapoh ri Thailand ha kine ki 6 bnai kiba la leit bad ym shim la lap satia. Hato phin ong ba ka Thailand kam long kaba shngain?”
U Bah Paul ula ong ba ki don ki Local Guides ne ki nongshong shnong ha ki jaka jngohkai kum ha ka Living Root Bridges. “Hynrei lada mano mano ki jied ban leitkai hi wat sha ki jaka ki bym shngain, kaei kaba ka sorkar ka lah ban leh” ula kylli.
Halor ka jingkynthoh na ki bahaiing jong ki shijur kiba la jah klep, ba kala suki palat ka rukom wad, u Bah Paul ula ong, “Kila shah ktah bha ha katei ka jingjia ia ki kumta kila kum kren tam. Hynrei ka Meghalaya ka don ia ki riat ki ram kiba eh bad jynjar. Kam long kum ki jaka ha ri thor. Ki don ruh ki shnong kiba jynjar ban poi bad dei na kane ba ki pateng kiba mynshwa kila tei ia ki Living Bridge”.
Ha kaba iadei bad ka jingjur ka jingpynsngew ba dei ban shim wai da ki nongshong shnong haba leit shangkai sha ki jaka lum ne riat, u Myntrio Sorkar ula ong, “Man la ka jingjia kadei kaei kaei kaba ai iaka jinghikai. Ngin sa pyrkhat thikna bha halor kane. Ka jingbthah ia kaei kaba dei ban leh bad ia kaba ym dei ban leh, kadei kaba lah dep ban pynmih shi bnai mynshwa”.
Ula banjur ba ka kam jngohkai ha Meghalaya kadei kaba iar kaba iadei bad ki shnong ki thaw. “Kiba bun ki jaka jngohkai kidei kiba la longtrai da ki shnong ki thaw ne da ki riewshimet. Ka sorkar kala shu ai tang ka jingkyrshan” ula ong.
U Bah Lyngdoh ula kyntu da kaba ong “Ki briew ki jah ha kylleng ki ri jong kane ka pyrthei. Wat ia ka ri Bilat ne Amerika ym shim la niew satia ba kidei kiba da shngain pura. Ka ri India kadei kawei na ki jaka jngohkai kaba shngain bha”.
Ula pynkut da kaba ong, ba kitei ki shijur ki lah ban leitkai hi sha ki jaka kaba ka lynti iaid kam long satia kaba shngain khlem kino kino ki nongialam lynti. “Haba ki briew ki leit ‘Honeymoon’ kin ym kwah ba yn don ban wan synran lang ia ki. Hynrei ki don kiei kiei kaba wat u briew ruh ym lah ban tehlakam” ula ong.
