Shillong, Risaw 24: Ka Meghalaya United Christian Forum (MUCF) kala pynpaw ba ka sorkar jylla kadei ban pynkynriah noh iaka tarik ban pynkut iaka Cherry Blossom ha ka Sngi U Blei, da kaba pynlong noh ha kawei ka sngi, kum ka dak jong ka jingburom ia ka jingsngew jong ki riewngeit Kristan kiba don da ki lak ngut.
Katkum ka kyrwoh kaba la phah da u Chairman ka Forum u Rev Batkupar Dunai, ula pynpaw ba ka MUCF ka ngeit skhem ba man la ka sngi kadei ka sngi kaba la ai sngewbha da u Blei, hynrei ka Sngi U Blei kadei ka sngi kaba khuid bad kaba kyrpang, kaba ki riewngeit ki leit ban mane ha ki ïingmane lait noh tang ia ki katto kane ki Balang kiba mane ha kiwei pat ki sngi.
“Ha kaba iadei bad ka Cherry Blossom Festival kumba kala mih ha ki lad pathai khubor ba kan kut ha ka Sngi u Blei, ka Meghalaya United Christian Forum kan dap da ka jingsngewnguh ia ka sorkar jylla lada ka pynkynriah noh ia katei ka tarik pynkut da kaba pynlong noh ha kawei pat ka sngi, kum ka jingburom iaka jingsngew jong ki riewngeit haka jylla Meghalaya kiba shim ba ka Sngi U Blei kadei ka sngi kaba kyrpang bad kaba kyntang kaba ki riewngeit Kristan kin ioh ban duwai bad ban mane ia u Blei khlem kano kano ka jingpynwit ne da kaba pynlong kino kino ki prokram ne tamasa” la pynkut u Rev Batkupar Dunai.
Kumban shu pynkynmaw, ka sorkar jylla kala pynbna ba kan pynlong ia ka Cherry Blossom Festival kaba 3 sngi kaban sdang haka 17 tarik u Naiwieng bad yn pynkut ha ka 19 tarik u Naiwieng kaba dei ka sngi u Blei.
Bun ki kynhun, ki seng bapher bapher bad ki kynhun jong ki niam Kristan kila pynpaw ia ka jingpyrshah jur ban pynlong ia katei ka tamasa haka sngi u Blei bad kila dawa ba ym dei ban pynlong iaka tamasa ha ka sngi u Blei.
