Shillong, Risaw 29: Ka Hima Khyrim hynne ka sngi saitjain, kala pynbna ban pynlong iaka jinglehniam bad ka Shad Nongkrem haka 1 bad 2 tarik Naiwieng ha Madan ïingsad kaba don ha ïing Syiem Smit.
Ia kane la pynbna da u Syiem ka Hima Khyrim u Paiem Balajied Sing Syiem uba la iathuh baka Hima kala iaid shaid shaid iaki jingpynkhreh ban pynthikna ba kane ka jinglehniam bad ka Shad Nongkrem kan long kaba jop.
U Paiem Balajied ula ong ba ia kane ka lehniam bad ka Shad Nongkrem la sdang naduh ki por mynbarim naduh ba dang don tang ka Hima Syllong bad dei tad haduh 1853 ba la mih ka jingiapyllait noh hapdeng ka Hima Kyrim bad Hima Mylliem.
“Ia kane ka jinglehniam la sdang naduh ki por baka ïingsad ka dang don ha Nongkseh bad ka Hima Khyrim mynta u snem kala pynkhreh ban pynlong iaka jinglehniam bad Shad Nongkrem kumba la leh man u snem ha ha Madan ïingsad kaba don ha ïing Syiem Smit” la ong u PaieM Balajied.
Haba batai halor ka jinglehniam, u Paiem ula iathuh ba haka 1 tarik Risaw kan don shwa ka jinglehniam bad ka Shad Shynrang ha Lum Pomblang Iewduh bad haka 2 tarik jong ka sngi kut kan don ka jingiashim bynta jong baroh ki khun Khasi ka Bri U Hynniewtrep hashuwa ka Pom Blang.
U Paiem ula ong ba ka Hima kam peit khmat iano iano hynreu ka pdiang lut ia baroh ki khun ka Bri U Hynniewtrep ban wan shim bynta ha ka jingshad Nongkrem namar kane kadei ka kawei ki bynta ban ithuh iaka jinglong kyrpang ki khun Khasi.
Haba iadei bad ka jingpynkhreh iaka lehniam bad Shad Pomblang, u Paiem ula iathuh ruh baka Sorkar Jylla lyngba ka Meghalayan Age Limited kala mang T.2.68 klur naka bynta ban shna pynbha iaka jaka shong ki paidbah ban sakhi iaka lehniam ha Lum Pomblang Iewduh.
