Shillong, Nailur 28: Ki samla thepkam Nurse hynne ka sngi saitjain, kila dawa na ka Sorkar Jylla ban ban pynmih iaka Result kaba shai ha ryngkat ki kyrteng, Roll Number bad ki Marks.
Kine ki samla thepkam Nurse kila kynnoh ba ka jingpynmih iaka Result hynne ka step 10 baje mynstep ka long kaba thurmur namar ia ka Result la pynmih khlem kdew shai ia ki Roll Number ba don ruh ki Roll Number kiba mih arsien.
Haba kren sha ki lad pathai khubor u samla Lurstep Nongrum ha ryngkat bad kiwei pat kiba ki thepkam Nurse kila pynpaw ka jinglyngngoh ia ka rukom pynmih iaka Result.
U samla Lurstep ula kynnoh ba ka jingpyllait ia ka Result ka long thurmur namar ba kam shai, namar ki Roll Number kim long kiba iaid ryntih ne ‘Serial’ bad bun ruh ki Roll Number ki jah ha ka jingpyllait ia ka Result.
“Kane ka jingpynmih Result kam long kaba shai namar kam kdew mano ba Pass, mano ba Fail, katno ka Cut off Marks namar wat ki Roll Number kiba paw ruh ki kdew, mano kiba hap ha ka Khasi-Jaintia Category, Garo Category bad Unreserved Category” la kynnoh u samla Lurstep.
U samla Lurstep ula ong, ba ka Sorkar kadei ban pynshai halor kane ka rukom pynmih iaka Result bad ula kynnoh ruh ba don u Roll Number uba mih arsien.
U la kynnoh ruh ba katkum ka Advertisement, iaka kam Nurse yn thung katkum ka Merit List hynrei ha kane ka Result, ka khlem kdew satia ia ka Merit List.
“Ka jingdawa jong ngi ka long ba ka Sorkar kadei ban pynmih lut iaka Result namar ngi kwah tip, katno ngut don kiba iakhun iaka eksamin ha ryngkat ki Roll Number bad kyrteng, katno ngut kiba Pass, da katno Marks ki ioh, bad mano ba Fail” u la ong.
