Shillong, Nailur 24 : Ha ka khana ba ai mynsiem bad ba pynshisha ba ka rta ka dei tang u nombor, kawei ka Longkmie ba 53 snem ka rta, kala pyndep ia uwei u mawmer da ka jingioh ia ka Bachelor’s of Arts (BA) Degree. Ka jingiaid lynti kane ka longkmie ka pynkynmaw ba ka jingkut jingmut bad ka jingtreikam, ki jingphohsniew ki dei kiba lah ban pynurlong ha kano kano ka rta.
Kane ka Longkmie ka dei ka Kong Lakyntiew Syiemlieh ba na Umsning Lum-Umpih. Kane ka longkmie ym tang ba ka la long ka Kmie hynrei ka dei ruh ka Nonghikai, kaba hikai mynta ha Persara Upper Primary School ha Umsning.
Ka jingkut jingmut jong ka ban pynbteng ia ka jingpule ka dei kaba phyla bad kala lah ban pyndep ia ka graduate mynta u snem hadien ka jingleit pule hapoh ka Balawan College, Umsning.
Ka khana jong kane ka Longkmie ka pynkit jingmut bha ia ka jingong ba paw bha ba ka rta kam dei ban long ka diengpyngkiang ha ka jingpule. Ka kong Lakyntiew ka long kum ka nuksa ba phalang, kaba pyni ia ka jingpyrkhat bakla ba ka pule ka puthi a dei thik tang ia kiba dang khynnah ka rta. Ka jingiaid lynti jong ka, ka phah ia ka khubor kaba shai kdar ba “Ka pule puthi kam tip ia u pud jong ka rta”.
Haba ai jingithuh ia kane ka jingjop, ka Education Cell jong ka Khasi Students’ Union (KSU)-North Khasi Hills District, kala pynkup burom ia ka kong Lakyntiew namar ka khana jong kane ka Longkmie ka long kum ka jingai mynsiem ia kiwei pat la ki dei kiba dang khynnah ka rta ne kiba la san la rangbah, kaba pynshisha ba kam long diengpyngkiang ha ka lynti iaid ban wad ia ka jingstad bad ka jingjop.
