Shillong, Jylliew 30: U nongialam ka United Democratic Party (UDP) u badei ruh u Myntri Sorkar bah Paul Lyngdoh hynne ka sngi Thohdieng, ula ong baka jingpyntreikam iaka roster system kan dei nangne shakhmat ne prospectively.
Haba kren sha ki lad pathai khubor u bah Paul ula ong ba ka office memorandum (OM) ba thymmai bala pynmih haka 14 tarik mynta u bnai kala khein iap noh iaka OM bala pynmih ha u snem 2022 bad ka kdew ba ka jingpyntreikam kan dei nangne shakhmat.
“Ka OM ba tymmai ka kdew ba iaka Roster System yn pyntreikam nangne shakhmat kaba mut naduh bala pynmih iaka OM” la ong u bah Paul.
Kane ka jingkren u bah Paul kala wan hadien baka KHNAM bad kiwei ki sengbhalang kila pynpaw ka jingbynniaw halor ka OM thymmai ba pynmih ka sorkar halor ka jingpyntreikam iaka Roster System.
Naka liang u general secretary ka UDP u bah Jemino Mawthoh ula ong ba ka nongrim jong ka Party kadei hi ban pyntreikam iaka roster system nangne shakhmat.
“Ka jingpyntreikam iaka Roster kadei katkum ka jingpynmih iaka OM thymmai bad kane kadei hi ka nongrim jong ka Party ban pyntreikam nangne shakhmat yn ban phai dien” ula ong.
U bah Jemino ula ong iathuh ba shen ka Party kan sa phah ki jingai jingmut shaka kong Ampareen Lyngdoh kaba khmih iaka Committee ba don ki sengsain pyrthei haba iadei bad ka jingdonkam ban thaw daka Formula ban pdiang bad ban pynhun ia baroh ki jaidbynriew hapoh ka jylla halor ka jingpynkylla iaka State Reservation Policy.
Ula iathuh baka party kala pynlong kumba 12-13 sien ka jingialang ban iathir halor kane bad kala pynkhreh 8 tylli ki jingai jingmut kiba ka Party kala iathir ruh haka jingialang ka CEC jong ka Party hynne ka sngi.
Ula iathuh ba ka Party kala aiti shaka Core Committee ban pynbiang iaki jingai jingmut bala ai daki dkhot jong ka CEC.
“Ka Core Committee kan pynbit pynbiang iaki jingdonkam halor ki jingai jingmut baka Party kala pynkhreh bala ai da baroh ki dkhot ka CEC kiba la wan na kylleng ki district ka jylla bad shen ka Party kan sa phah ia kine ki jingai jingmut shaka sorkar hapoh 2-3 sngi” ula ong.
Pule ruh: “Ngam don jingshun shimet ia ka Kong Phidalia hynrei namar ki kam jong ka”: Paul Lyngdoh
 u badei ruh u Myntri Sorkar bah Paul Lyngdoh hynne ka sngi Thohdieng, ula ong baka jingpyntreikam iaka roster system kan dei nangne shakhmat ne prospectively.){kind=link}