Shillong, Iaiong 19: U Nongialam ka United Democratic Party (UDP) bad Myntri sorkar bah Paul Lyngdoh hynne ka sngi Balang ula ong ba ka jingpybeit ia ka jingleh bakla haka bhah thung lane ka Reservation Policy mynta la palat 50 snem kam dei ka kam kaba lah ban pynbeit tang hapoh 5 snem.
“Kadei ka jingshisha ba kala don ka jingbakla 50 snem, kumno ban pynbeit ia kane?, Ka long kaba eh mynta namar kadei ka mat kaba la neh palat 50 snem bad dei namar kane ym lah ban pynbeit ia ka tang hapoh 5 sngi. Kadei ka jingbakla bala neh mynta palat 50 snem, kam dei ka mat ba lah ban pynbeit tang hapoh 5 sngi, 5 taiew ne 5 bnai” ong u bah Paul.
Haba kylli u bah Paul ula ong “Balei phi kam shym la don ka jingbakla, ka la don shibun ka jingbakla ha kane ka Policy, kum ban ai nuksa kumno lah ban ai por haduh 2-3 snem ban pyndap iaki kam ba lait thylli bad mynta lada don ka kam ba lait thylli haduh 12 ngut kumno hap ban ap haduh 2-3 snem ban pyndap ia kine ki kam, hato kane kam kdew ba ka jingtreikam ka tlot noh namar kane ka ophis treikam kam don nongtrei”.
Haba kubur iaka jingma lada don ba iakhun pyrshah iaka Reservation Policy, u bah Paul ula ong ba ka long kaba ma namar ki don bun ki jyrwit jyrwat bad kane kan pynlong kumba ki paidbah ki siat da lade ialade bad kane kan wanrah ka jingmynsaw hi ia u paidbah.
Halor ka jingpyntreikam iaka Roster System, u bah Paul ula ong ba ka sorkar MDA kan sa shong jingialang ha kane ka taiew lane ka ka taiew ban wan naka bynta ban iakren halor kane ka mat.
“Ia kane ka mat yn iakren ha ka jingialang ka kynhun Myntri bad hadien kane kan don ruh ka jingiakren ha ka jingialang jong baroh ki sengsain pyrthei bad dei ha kine ki rynsan baroh ki lah ban iaphylliew jingmut lane ban ai jingmut kumno ban iaid shakhmat” ula ong.
U bah Paul ula ong ba ka jingdawa pyntreikam iaka Roster System naduh bala mynjur daka sorkar ka long kaba biang eh bad kum u myntri sorkar un ai jingmut ia kane ha ka jingialang ka kynhun myntri sorkar, kaba ar lah ban iakhun ia kane ha Supreme Court bad kaba lai ka ïing dorbar thaw ain ka jylla bad ka kynhun myntri sorkar jylla ka lah ban iakren halor kane.
“Namar kane ai lad ban kane ka mat kan wan haka kynhun myntri sorkar bad ngan pule bniah ia kane bad ngan sa ai jingmut” ula ong.
Nalor kane u bah Paul ula kubur ba ka UDP kala bsuh haka Manifesto jong ka Party ban bishar bniah biang iaka Reservation Policy bad ula ong “Ngi la pynieng 46 ngut ki kyrtong hynrei jop tang 11 ngut kata khlem khien lang iaki 10 ngut ki kyrtong na Garo Hills bad kane ka pyni ba bun na kiwei ki constituency kim kwah ban wanrah ka jingkylla iaka Reservation Policy.
U bah Paul ula ong ba ka mut 25 tylli ki constitueny kim kwah ban don ka jingkylla hapoh ka Reservation Policy bad lada khien lang iaka UDP 11 ngut bad VPP 4 ngut kan long 16 ngut.
