Shillong, Lber 26 : U President ka Hill State People’s Democratic Party (HSPDP) Bah KP Pangniang ha ka sngi Ba-ar, ula ong ba ka kynhun Regional Democratic Alliance (RDA) ka dei kaba la thaw hapoh ka jingialam u President barim ka UDP (L) Dr Donkupar Roy bad u President barim ka HSPDP Ardent M Basaiawmoit, uba khlieh mynta ia ka seng thymmai Voice of the People Party (VPP).
“Phi dei ban kylli ia u Bah Ardent halor ka jingthmu ba thaw ia ka RDA ha u snem 2017” ong u Bah Pangniang haba iakren bad ki nongthoh khubor.
Kat kum ka jingong jong u, ka RDA ka kwah ban pynthikna ia ka jingiatylli hapdeng ki seng riewlum bad ban ioh ia ka jingkyrshan jong ki paidbah ka Jylla. ‘Da kane ka jingmut jingpyrkhat, ngi la rai ban nang pynkhlain ia ka RDA” ula bynrap.
Haba pynpaw ba ki paidbah ka Jylla kila ai ka jingshaniah ha kine ki artylli ki seng riewlum, u Bah Pangniang ulaong “Baroh artylli ki party ki don ia ka vote share ba palat 3.35 lak bad ngi ngeit ba kane ka dei ka dak ba ki paidbah ki kwah ia ngi ban iatreilang”.
“Ngi kyrmen ruh ba ki paidbah kin nang bteng ban kyrshan ia ka RDA ha kane ka elekshon Lok Sabha kumba ki leh ha u snem 2023” ula bynrap.
Shuwa kane, u President ka UDP Bah Metbah Lyngdoh ula ong ba ka UDP bad HSPDP hapoh ka RDA, ki sngewskhem ban jop na Shillong constituency.
“Ngin iatrei shitom ha kine ki taiew ban wan na ka bynta ka sngi thep vote. Ngi la iatreilang bad ka HSPDP bad ngi la don ha kajuh ka rynsan ha kaban iatrei na ka bynta ka bha ka miat jong ki paidbah bad ruh jong ka Jaidbynriew” ula ong.
Haba kylli, u Bah Metbah ula ong ba ym don mano manor uh kiba lah ban bthah ia ka RDA ba kin sangeh noh ha kaban iakhun ia ka elekshon MP.
