Shillong, Iaiong 24: U Myntri ka tnad pule puthi Rakkam A Sangma u la ban jur ba ka jingthmu ba shisha jong ka pule puthi kam dei tang ban ioh ki Marks ba heh haki eksamin hynrei ka dei ban long kaba tei iaka lawei ki khynnah.
U Rakkam u la ong ba ka jingthmu ba kongsan ka dei eh ban sain dur ia ki briew ba kin long kiba bha.
“Ha Meghalaya, ka jingnang jingstad kam dei tang ka jingioh kam ioh jam bad ki kam Dorkar. Ka jingnang jingstad kan pynlong shisha ia phi kiba bha, kum u briew” la ong u Sangma ha ka jingrakhe ia ka World Earth Day 2025 kaba la pynlong da ka Mawsynram Border Area College (MBAC), Mawsynram.
U Rakkam u la pynpaw ba ka kyrdan jong kano kano ka jaitbynriew ne ka Jylla ka paw ha ki jinglong jingman jong ka ha ka pule puthi bad u la kyntu ïa ki khynnah skul bad ki nonghikai ban pdiang ïa ka lad ban ïoh jinghikai bad hikai ruh ia kiwei da ka ba khuid mynsiem.
Haba kren shaphang ka jingsngew khia kaba ki khynnah skul bad ki nonghikai ki ju sngew haba ki leit klas, u la ong, “Wat sngew kumta.”
U la batai ia ka jinghikai kum ka lad ba la ai da U Blei ban thaw dur ia ka pyrthei kaba kham bha bad u la pynshlur ia ki khynnah skul ban ialeh ban long ki briew kiba bha.
U Myntri u la kren ruh shaphang ka jingpyrkhat jong ka Sorkar ia ki jait jingialehkai bad ka jingpynroi ia ki samla.
U la pynbna ba ïa ka Detailed Project Report (DPR) na ka bynta kawei ka Indoor Stadium ha kane ka kolej ba la dep ban pynkhreh bad shen yn sa sdang ban shna ïa ka.
Haba phai khmat sha ka National Games, kaba ka Meghalaya kan sa pdiang shen, Rakkam u la ong ba kane ka dei ka mawjam kaba kongsan bha na ka bynta ka Jylla.
U la bynrap ruh ba ki jingtei bapher bapher jong ka jingïalehkai ki dang pynbha kum ka jingpynkhreh na ka bynta ka National Ganes.
Ha ka sngi rakhe ia ka World Earth Day, u Myntri u la pynpaw ruh ia ka jingsngewkhia halor ka jingkylla ka mei mariang kaba ktah ia ka pyrthei.
U la ban jur ia ka jingpyrshang kaba kyrkieh bad kaba iatreilang ban iada ia ka mei mariang bad kyntu ia baroh ban noh synniang ha la ki jong ki jong ki rukom kiba rit sha ka jingpynneh pynsah ia ka mariang.
