Shillong, K’lyngkot 15 : U Myntri Rangbah ka Jylla Conrad K Sangma ha ka sngi Palei, ula ban jur ia ka jingdonkam ka jingiamynjur lang da baroh halor ka project lynti rel ha ri-lum Khasi-Jaintia bad ong “Ngi la kren shai, ngin jam shakhmat satang lada ngi lah dep iasyllok bad ioh ia ka jingmynjur jong baroh”.
Ula pynpaw ia ka jingbynniaw ba bun na ki seng sain pyrthei ki khlem wan iashimbynta ha ka jingialang jong baroh ki seng sain pyrthei (All Party meeting) ban iakren halor kane ka kam.
U Conrad ula kyntu ia ki Liang Pyrshah ban wan lang noh sha ka jingiasyllok, bad ong “La ngi mynjur ne ngim mynjur, satang lada ngim kwah iakren, da lei lei ruh ngin ym poi shano shano”.
U Conrad ula iai ban ia ka jingkut jingmut jong ka Sorkar ban pynlong ia ka jingiakren bad baroh ki kynhun ba don bynta, haba batai “Ngin iai bteng ban pynsngewthuh ia ki paidbah halor ki jingmyntoi jong kane bad ngin pyrshang ban leh eiei halor ki jingsngewkhia kaba ki lah ban don bad ngin peit la ngi ban poi sha ka jingshimrai bad hadien kane ngin sa lah ban leit iakren sha Delhi”.
Ula ban jur ba ka project lynti rel ka long kongsan bha ha ka ioh ka kot hynrei ula kubur ia ka jinghap long husiar bha, kaba donkam ban bishar bniah thik pa thik.
Ka Sorkar kala thaw ia ka All-Party Committee ban iakren ia ka project lynti rel, hynrei katto katne ki seng Sain Pyrthei kila kyntait ban iashimbynta.
