Shillong, Naitung 04 : U Nongialam ka BJP bad Myntri Sorkar Bah A.L.Hek ha ka sngi Thohdieng, ula pynpaw ba ka por ka la dei ia ka Assam bad Meghalaya ba kin shim ia ki lad iapynbeit ka ban pynkut noh syndon ia ka jingiakajia pud bala neh da ki phew snem hapdeng ki ar Jylla.
Haba iakren bad ki nongthoh khubor, u Bah Hek ula ong ba ka kam iakajia pud ka dei kaba la iakren haduh ka kyrdan jong u Myntri Rangbah ka Assam bad Meghalaya.
“Hynrei, ka por kala dei (ia baroh ar Jylla) ba kin shim ia ki lad iapynbeit ka ban long shirta khnang ban pynkut noh ia kane ka kam” ula ban jur.
Kat kum ka jingong jong u, kane kan iarap bha ban weng noh ia ka jingeh bala mad da ki paidbah kiba sah ha ki jaka khappud da ki phew phew snem mynta.
Hynriew na ki 12 tylli jaka iakajia la dep ban iapynbeit hapdeng ki ar Jylla bad mynta ka wat kaba ar jong ka jingiakren pynbeit pud hapdeng ki ar Jylla ka dang iaid shakhmat.
