Shillong, Nailur 17: U Myntri Khynnah jong ka Sorkar Pdeng ba khmih ia ki tnad Jal Shakti, Food Processing bad Industries, u Prahlad Singh Patel hynne ka Sngi u Blei, ula ong ba ka skhim ‘PM Vishwakarma’ ka long ka jingai burom ia ki nongshna tiar tynrai.
U Patel ula ong, ia kane ha ka jingai jingkren jong u ha nongbah Shillong ha ka jingplie paidbah ia katei ka skhim da u Myntri Rangbahduh ka ri u Narendra Modi.
Ula ban jur ba ki nongshna tiar tynrai ki don ka bynta kaba khraw ha ka imlang sahlang da kaba pynneh ia ka deiriti bad ki rukom shna tiar ba hyndai jong ka India hynrei kim pat ioh ka jingithuh kaba kidei ban ioh namar ka sap ka phong kaba ki don.
U Patel ula ong, ba dei u Myntri Rangbahduh ka ri u Narendra Modi uba la leh ia kaba donkam na ka bynta ki nongshna tiar tynrai da kaba sdang ia ka skhim ‘PM Vishwakarma’ bad kane ka sienjam kan ai jingkyrshan bad ai jinghikai ban pynkupbor ia kine ki dkhot ba kongsan jong ka imlang sahlang.
U la ai khublei ia baroh ha ka Vishwakarma Jayanti bad ula ong ba kane ka dei na ka bynta ki nongshna tiar tynrai bad ula pynpaw ka jingsngewnguh ia u Myntri Rangbahduh uba la sdang ia kane ka skhim na ka bynta ki nongshna tiar jong ka ri.
“Ka long kaba hap ban kdew ruh hangne bad kane kadei ka lyngkhuh sngi kha jong u Myntri Rangbahduh jong ngi, u Narendra Modiuba uba la trei met bad mynsiem ban tei ia ka India kaba riewspah. Kane kadei ka sngi kaba kyrpang ha ka jingiaid lynti ka India namar ka Sorkar kala wan shakhmat kum ka nongiatreilang ban kyntiew ia ka burom, pynkhlain ia ka jinglah treikam bad pynkhlain ia ka jingriewspah jong ki nongshna tiar tynrai” ong u Myntri Khynnah jong ka Sorkar Pdeng.
Haba batai shaphang ka skhim, u Myntri ula ong, ba ha kine ki san snem ban wan naduh u 2023-24 haduh 2027-28 ha ka jingmang tyngka kaba T 13,000 klur, 18 tylli ki kam ba kongsan kiba iadei bad ki nongshna tiar – misteri; nongshna lieng; nongshna tiar ialeh thma; nongshohnar; nongshna tyrnem bad ki tiar, nongshna tala; nongshna ksiar; nongshna khiew; nongshna tiar da ki maw, nongshoh maw; nongsuhjuti; misteri maw, nongshna shang, nongthain tyllai, nongshna khunbynriew bad jingialehkai, nongkhapshniuh; nongshna jingdeng da ki syntiew, nongsaitjain; nongsuhjain bad nongshna jar tong dohkha kin hap hapoh ka skhim PM Vishwakarma Scheme.
Ula ong ba kitei kin ioh jingithuh lyngba ki PM Vishwakarma certificate bad ID card, ka jingpyntbit shuh shuh, ka jingmyntoi kaba T.15,000, ka jingkyrshan pisa kaba haduh T 1 lak ha ka wat banyngkong bad T. 2 lak ha ka wat baar, bad ka sut kaba duna kaba 5%, ka jingmyntoi na ki jingsiew digital bad ka jingiarap ban pyniaid iew ia ki tiar.
“Ka skhim ‘PM Vishwakarma’ kadei ka dak jong ka jingiakhleh jong ki jingngeit tynrai bad ki rukom shna tiar tynrai bad ka skhim ka plié lad kamai jakpoh bad ha kajuh ka por ka pynneh ia ka Guru-ShishyaParampara kaba hyndai jong ka India” la ong u Myntri.
Ha ka jingbatai shaphang ki sienjam ban ai jingpyntbit shuh shuh iaki nongshna tiar ba la tbit lypa, u Patel ula ong, ba ha ka por ai jinghikai, yn ai T.500 ha ka shi sngi ia ki nongshna tiar bad ula ong, ruh ba yn ai jingmyntoi kaba kot haduh T. 15,000 bad ka Sorkar kan iarap ban pyni, ban song bad ban pyniaid iew ia ki tiar.
Ia kine ki tiar ba shna da ki nongshna tiar tynrai yn buh ruh ha ka Government e Marketplace (GeM) khnang ba kin kham iaid iew bad ula kyntu ia ki bor pyniaid ha ka jylla ba kin kyntiew jingtip khnang ba ki briew kin kham tip shaphang kane ka skhim bad ba kin ioh jingmyntoi.
