Shillong, Rymphang 04: U Myntri ka tnat PHE Marcuise N Marak u la leit ban jurip ia ka New Shillong Water Supply Scheme bad pynpaw ia ka jingihun ha ka rukom iaid jong ki kam.
“Nga sngewkmen shibun ban pynpaw ba ka kam ka iaid bha bad nga kyrmen ba ia kane ka project yn lah ban pyndep hapoh ka por ba la buh. Ka jingpyndep ia ki jingtrei Civil Work ka long haduh 30 percent bad ka jingthied ia ki pipe, ki pump, ki mashin bad kiwei kiwei ki tiar kala kot haduh 90 percent,” ong u Marcuise.
Ka projek ka la mad ia ka jingslem ban sdang namar ki jingeh ban ioh jaka hynrei mynta la lah ban pynbeit ia kane ka kam.
La khmih lynti ba ka jingtei ia ka jaka pyllang um (am) yn sdang hapoh ki 10 sngi ban wan namar ka jingtei ia ka nongrim jong ka Dam kala jan dep.
“Ka la don ka jingpynslem khyndiat namar ki jingeh ban ioh jaka, kumta ki Ophisar ki la leit iakren bad ki trai jaka kaba la shim por la jan shisnem bad ka la don ka jingeh ban ioh jaka ban tei iaka dam bad ngi hap ban pynkynriah ia ka jaka. Namar kata, ka la shim por la jan shisnem namar ngi donkam ruh ban shna surok ban poi shaka dam bad mynta ka jingtei iaka dam kala ïaid shakhmat” u la pynpaw.
U Myntri u la pyntip ba kane ka projek ka thmu ban pynbiang um haduh 15 million liter shisngi (MLD) ha kaba sdang hynrei ka tnat ka buh thong ban lah pynbiang um haduh 50 MLD.
Hadien bala pyndep, kane ka project kan pyndap um iaki longiing ha New Shillong Township nalor ki 32 tylli ki shnong ba marjan, u la ong haba bynrap ba ka wah Umkhen ka dei ka tyllong um kaba biang bha.
