Shillong, Risaw 26 : U Nongialam ka National People’s Party (NPP) bad Symbud Myntri Rangbah ka Jylla Bah Prestone Tynsong ha ka sngi Palei, ula ong ba ka NPP kam dei satia ka nongthied (importer) lane ka Nongdie (exporter) jong ki Nongialam sain pyrthei.
Haba iakren bad ki nongthoh khubor, u Bah Prestone ula ong “Ngim dei ki nongthied lane ngi dei ki nongdie..Ngi dei ka NPP, ka National People’s Party bad ngi trei hangne bad shakri na ka bynta ka bha ka miat jong ki paidbah bad ka Jylla Meghalaya bad ym tang ka Meghalaya hynrei ia ka thain Shatei Lam Mihngi baroh kawei”.
U Khliehduh ka Congress ha Jylla bad MP ka Shillong Bah Vincent H Pala dang shen ula kynnoh ia ka NPP ba ka dei ka nongthied (import) kyrtong kiba dei na ka All India Trinamool Congress (TMC) bad ka Bharatiya Janata Party (BJP) ha ka elekshon MP-Lok Sabha ban sa long ha u snem ban wan.
U Bah Pala ula kynnoh ruh ba ka NPP kala leit ban iakren bad u MLA barim ka Umroi Bah George B Lyngdoh na ka TMC.
Haba kylli halor kane, u Bah Prestone ula ong ba um don jingtip satia halor u Bah George ba u lah ban wan iasoh sha ka NPP.
“Ngam don jingtip..ngam bna eiei halor kane… namar kata phi lah ban kyllim na u Bah Pala” ula bynrap.
