Mendipathar, Rymphang 22 : U National President ka National People’s Party (NPP) Conrad K Sangma hynne ka sngi Balang ula ong ba ka Sorkar ba ialam da ka NPP kala lah ban wanrah ia shibun ki kam pynroi ha Ri-lum Garo bad kala lah ruh ban pynkylla ia ka na ka jingiathuh kum ka “Disturbed Area” (jaka ba jur ki jingumsnam) sha ka jaka ba shongsuk.
U Conrad ula kren ia kane na ka rynsan ialap elekshon ha Mendipathar bad ong ba ka Sorkar ba ialam ka NPP kaa lah ban pynkylla ia ka jingmut jingpyrkhat jong ki paidbah halor ka Ri-lum Garo la ka dei ha ka Jylla ne shabar ka Jylla, khamtam ha ka Sorkar Pdeng.
“Ha kine ki 5 snem, ngi la iohi ia shibun ki jingkylla bad ka roi ka par. Ka Ri-lum Garo kaba ioh ia ka nam kum ka jaka ba jur ki kam iaumsnam bad kam pyntriem hynrei mynta ki jinglong jingman kila kylla lut bad kala kham bha. Ki briew kila leh ban leh business bad khaii khlem kano kano ka jingshah pyndik” ong u Conrad.
Haba pan ia ka jingkyrshan ia u kyrtong ka NPP na Mendipathar u Marthon Sangma, u Conrad ula ong uba la ong ba ha Meghalaya, ka sorkar ba ialam da ka NPP kala shna ia bun ki surok ha kine ki lai snem haba ianujor bad ki 30 snem bala leit noh. Ula ong ba jan kot 200 Km ka surok hapoh ka PMGSY la dep ban shna ha kine ki lai snem bad 3.5 lak ngut ki briew ha ki jaka nongkyndong kila ioh ia ki kor um hala iing.
U ong ba ka Sorkar India kala iaroh ia ka Meghalaya halor ka jinglah ban pyntreikam ia ki skhim bapher bapher.
Haba ban jur ba ka NPP kum ka Sorkar kala buh hakhmat eh ia ka jingdonkam u paidbah ban trei ruh da ka mynsiem ban iakit iabah lem para mynsiem briew, ula ong “Kum ka Sorkar, ngi la khot iakren ia ki kynhun bapher bapher ban iapynbeit ia ki jingeh ba ki don bad ngim ju pyndonkam ia ka bor ban weng ia ki jingeh jingwit”.
Ula pynpaw ruh ba ki paidbah ka Jylla kila kut jingmut ban kyrshan ia ka NPP namar kila iohi ba kumno ka NPP ka treikam ha kaban weng ia ki jingeh jong ki paidbah. “Ngim ju pyntieng ia ki paidbah da ka suloi. Ngi ngeit ha ka nongrim ban sngap lem ia ki jingeh jong ki paidbah” ula ong.
