Ka NPP ka dei ka seng sain pyrthei ba pynleit jingmut ha ka roi ka par ; ong u Conrad

Shillong Nailar 06: U National President ka NPP bad Myntri Rangbah ka jylla u Conrad K Sangma hynne ka sngi Baar, ula pdiang sngewbha ia u MLA ba marwei jong ka seng Congress u Bah Ronnie V Lyngdoh sha ka seng National People’s Party (NPP) bad ong, ba ka NPP ka pynleit jingmut ha ki kam sain pyrthei ban wanrah ia ka roi ka par.

Haba kren ha ka jingialang u Conrad Sangma ula ban jur ia ka jingdonkam ban don ka jingiatylli bad ka jingkitkhlieh, “Um don u nongshun uba shirta bad u paralok uba shirta ha ka kam politik. Hynrei kaei kaba kongsan tam kadei ka jingkular ia ki paidbah bad ia ka jylla”.

U Conrad Sangma ula pdiang sngewbha ia u Bah Ronnie Lyngdoh bad ia ki bahaiing bahasem bad ka kubur ba kila shim ia ka rai kaba eh kaba la pynlong ia ki ban pyniasoh sha ka NPP.

“Bah Ronnie, nga shim ia kane ka kabu ban pdiang ia phi sa shisien sha ka iing ka sem jong ka NPP. Nga kwah ruh ban ai khublei bad ban pdiang sngewbha ia ki bahaiing bahasem ki jong phi. Nga tip ba kane ka rai kum kane kam long satia kaba suk bad ka iing ka sem ka don ia ka bynta kaba khraw kaba kongsan ha kaban kyrshan ia phi ha ki por kiba eh ba phin lah ban shim ia ka rai kaban pynkylla ia ka jinglong jingman ha ka kam sain pyrthei ym tang ha Mylliem constituency hynrei ha ka jylla baroh kawei” ula ong bad ka ai khublei ia ki nongialam bad ki nongkyrshan jong u Bah Ronnie kiba la ai ia ka jingkyrshan.

U Conrad ula iaroh ruh ia u Bah Hamletson Dohling u Working President ka NPP uba long u MLA barim ka Mylliem ia ka bynta kaba kongsan ha kaban plie lad ia ka jingwan pyniasoh u Bah Ronnie Lyngdoh.

“Nga kwah ban ai khublei kyrpang ia u Bah Hamlet uba la pdiang sngewbha ia kane ka jinglong jingman bad ban sngewthuh ia ka jingkongsan ia ki paidbah ka Mylliem constituency, ia ka seng bad ia ka jylla baroh kawei” ula ong.

U Sangma ula pynthikna ruh ia ki paidbah ka Mylliem constituency ba ka NPP kan trei shitom ban kyntiew ia katei ka thain bad ban ai iaki lad ban kamai jakpoh na ka bynta ki samla bad ki longkmie.

“Ngan pynthikna ia phi ba hooid, ngi lah leh katto katne ki projek hapoh ka jingialam u Bah Hamletson ban leh ia ki kam bapher ha ka Mylliem constituency bad ngi lah pyrshang ban pynkylla ha ki lynti ki bapher ha ki snem kiba la dep hynrei mynta namar ba ka iing ka sem ka jong ngi kala nang khlain bad nang heh, nga pynthikna hakhmat ka jingdon jong baroh ki myntri sorkar, ki MLA bad ma phi baroh, ba ngin pynthikna ban trei arshah na ka bynta ka Mylliem constituency. Baroh ki jingtynjuh la lah ban jop. Ngi don ia ka kynhun kaba khlain, ngi don ia ka sorkar kaba kwah ban trei bad kala trei bad ai ba ngan pynthikna ha phi baroh ki paidbah ka Mylliem constituency ba ngin ym shongthait ban pynthikna ba ka Mylliem constituency kan kiew shaphrang bad ai ruh ia kiba bun ki lad ban kamai jakpoh ia ki samla bad ki longkmie jong ka Mylliem constituency,” la ong u nongialam ka NPP.

U Conrad Sangma ula ong ba kadei tang ka seng NPP kaba lah ban shaniah ban ialam shakhmat ia ka jylla da kaba banjur iaka jinglah ka jongka ha kaba iadei bad ka jingpyntreikam ia ki kam pynroi bad ka jinglah ban ai ka jingsynshar kaba bha.

“Ki prokram, polisi, ki mishon, ki jingtei ia ki jingtei ki bapher bapher, ia kaba bun ki briew ha ki snem kiba la leit kila pyrkhat ba kan ym lah ban jia hapoh ka jylla Meghalaya hynrei ia kine la lah ban pynurlong namar ka jingdon ia ka jingmut jingphyrkhat kaba bha, ka jingkitkhlieh na ka bynta ki paidbah bad ka jingbteng ban trei shitom kaba ngi la leh ha ki snem kiba la dep bad mynta da ka jingpyniasoh ka jong phi baroh, nga ong ia phi, ba ngi lah nang ioh mynsiem ban trei shitom shuh shuh bad nga pynthikna ha phi ba ngin trei shitom shuh shuh bad ngin jop ia baroh ki jingeh bad ki jingtynjuh ym da ka jingmut kaba sniew hynrei da kaba pynsngewthuh ia ki paidbah ba hooid ka NPP ka long kaba pher shisha bad ngi dei shisha ka seng kaba kyntiew ia ka jylla jong ngi bad dei tang kane ka seng hi kaba lah ban shaniah kaban ialam shakhmat ia ka jylla” ula ong.