Shillong, Nailar 06 : U Nongaiktien ka National People’s Party (NPP) bad MLA barim ka Mawsynram Bah HM Shangpliang ula ong ba ka Krem Mawjymbuin kaba don ha Mawsynram, kaba la bna nam kum ka “Jaka ba jur slap eh ha Pyrthei”, ka dei ia kaban pynneh beit kum ka jaka wan kai ki nongshang suwari ym ban pynlong jaka mane Blei.
Kane ka jingkynthoh kala mih hadien ba ki nongshang suwari na shabar ka Jylla, kila sdang pynlong ia ka krem Mawjynbuin kum ka jaka mane Blei.
“Na ka bynta ka shnong Mawsynram bad ia ka NPP party, nga kwah ban ong ba ka rai bala shim bad ka rai bala shim da ka Dorbar Shnong ka Mawsynram ban nym ailad ia ka krem Mawjymbuin ban long kum ka jaka mane Blei, ka dei kaba la kyrshan da ngi iwei pa iwei bad ruh da ka party” ong u Bah Shangpliang haba iakren bad ki nongthoh khubor.
U Bah Shangpliang ula ong ba ka krem Mawjymbuin ka la don la slem bha ha ka map shangkai suwari ka Jylla Meghalaya bad kane ka jingwan shangkai kala khring bha ia ki nongshang suwari na kylleng ki ri ka Pyrthei bad napoh ka Ri India ruh kumjuh.
Ula ong ba ka Tnad Tourism kala pynkut da ki lak tyngka ban pynroi bad tei ia ki jingtei ha kane ka jaka ban pynbit pynbiang ia ki jingdonkam jong ki nongwan shangkai, kiba wan iuhkjat ha kane ka krem.
“Kane ym tang ba ka iarap ban kyntiew bad pynpaw nam ia ka jaka hynrei ka plie lad ruh ia ki nong shongshnong ba kin kamai jakpoh. Kane ka krem kala iarap bha iaki briew ka Mawsynram ban kamai jakpoh” ula bynrap.
U Bah Shangpliang ula ong ba ka Mawsynram ka don artylli ki krem ba kongsan ba kynthup ia ka Mawjymbuin bad ka Krem Puri, ia kaba la niew kum ka krem ba jrong tam kaba dang hap ban iarung.
