Ka MRSSA kam dei ban bujli ia ka ILP, ong u Bah Paul halor ka jingtehlakam ia ka jingrung ki mynder

Shillong, Jylliew 27 : U Nongaiktien ka Sorkar MDA bad Myntri Bah Paul Lyngdoh ha ka sngi Thohdieng, ula ban jur ba ka ain Meghalaya Residents Safety & Security Act (MRSSA) kam dei kaba la wanrah ban bujli ne pyntreikam ha ka jaka jong ka Inner Line Permit (ILP).

U Bah Paul ula kynthoh ia kane ha ka por ba ki kynhun sengbhalang kila sdang mih biang ban dawa pyntreikam noh ia ka ILP ha Jylla, kaba wan jia hadien ka jingshah pyniap u nong Indore ha Sohra.

“Phi iohi, ka MRSSA kam dei satia ka substitute ne ka ban bujli ia ka ILP, hynrei ka MRSSA ka dei ka ain ka Jylla hakaba ka Sorkar Jylla bad ka Iingdorbar Thaw Ain kila iashong bunsien ban iatai. Bad ka dei, ha kawei ka jingmut, ka jingnang pynbha shuh shuh ia ka ILP namar la thaw ia ka da ki nongthaw ain kane ka juk ba mynta” batai u Bah Paul.

U Myntri ula kdew ba ka ILP kala mih naduh ka por ba synshar ka ri Bilat-ka Eastern Bengal Frontier Regulation.

“Namar kata, ka MRSSA kan air uh ka lad ia ka Iingdorbar Thaw Ain ka Jylla ba kan wanrah ia ki jingpynkylla na ka por sha ka por, haba iohi ia ka jingidonkam” ula ong.

“Kumta, nga ieh ha ka jingstad jong ki nongthep vote, hynrei hangne ngi don ia ka Ain ka Jylla kaba lah ban pynjanai ha kano kano ka por ba idonkam” bynrap u Bah Paul.