Shillong, Nohprah 15 : U Nongialam ka BJP bad Myntri Sorkar Bah Sanbor Shullai hynne ka sngi palei ula ban jur ba ka Jylla Meghalaya kan ioh ia ka Inner Line Permit (ILP) lada ioh thaw sorkar marwei ka BJP hapoh ka Jylla.
“Ai ia ngi 31 ngut ki MLA ban ioh thaw Sorkar marwei, ngin sa ai ha phi kat kaba phi kwah” ong u Bah Sanbor haba jubab ia ka jingkylli halor ka jingpynslem jong ka sorkar Pdeng ban pyntreikam ia ka ILP bad ka jingpynrung ia ka ktien Khasi bad Garo ha ka khyrnit ba phra jong ka Riti Synshar ka Ri India.
Haba kyrshan ia kane ka jingkam, u President ka BJP bah Ernest Mawrie ula ong “Kumba ong u bah Sanbor, ailad ia ngi ban don ha ka bor bad ngin sa leh ia kaba donkam”.
U Bah Ernest ula pyntip ruh b aula dep iakren ia ka kam ba iadei bad ka Ktien Khasi bad Garo bad ka Sorkar Pdeng ka dang shong bishar ia kane.
Ka BJP-Meghalaya mynta ka sngi kala pdiang burom ia lai ngut ki MLA barim ba kynthup ia u bah Himalaya Shangpliang, Benedic R Marak bad Ferlin CA Sangma lem bad u MLA shimet na Baghmara Samuel M Sangma ha ka jingialang ba long hapoh ka Ophis ka Party.
Haba kylli, u bah Ernest u pyntip ba sa arngut ki MLA kila wan iakren ia ka party. “Ngi dang pynkhreh ban iakren pynbeit bad ki” ula bynrap.
