Shillong, Naiwieng 21: Ha ka sngi Ba-ar jong ka Shillong Literary Festival 2025 la sakhi ia ka jingpynbna ia ki polisi bapher bapher, ka jingpyllait paidbah ia ki kot, ka jingiakren halor ka litreshor bad ka jingpyninam ia ka kolshor, kaba pynskhem ba ka Shillong kala nang kiew ha ka kyrdan kum ka shlem jong ka thoh ka tar bad ka pyrkhat pyrdaiñ.
Haba kren ha ka jingialang, u Myntri Rangbah ka jylla u Conrad K. Sangma ula pynpaw ba kane ka tamasa kala kiew shaphrang na ka jingsdang kaba rit bad mynta kala kylla long kum ka rynsan kaba heh bad ula tyrwa ban sdang ia ka jingiakob thoh ban pynshlur ia ki nongthoh kiba dang khynnah. “Ka Meghalaya kadei ban kylla long kum ka jaka kaba ka thoh kadei ban long shibynta ha ka rukom treikam bad ha ka kolshor ka jong ngi” ula ong.
U Myntri Rangbah ula pynbna ruh ban pyniar ia ka jingai ia ka Chief Minister’s Research Grant, ha kaba 75 ngut ki Scholar mynta kin ioh jingkyrshan ban leh ia ka Research ne jingwad bniah halor jong ki jaidbynriew Khasi, Garo bad Jaintia.
Ula pyntip ba kala don ruh kawei ka kynhun wadbniah kaba kyrpang kaba iaid shakhmat ban buh ha ki jingthoh halor ki tynrai, histori, ki jingiathuh kiba iadei bad ka kolshor jong kitei ki lai tylli ki jaidbynriew.
U Conrad ula pyntip ba ka Jylla kala iohnong haduh T.133 klur na ka jingkynshew ia ki tamasa bala dep, kaba la pynkhlain ia ka jingangnud ka Jylla ban pynlong ia ka Shillong kum ka Arts & Literary Capital ka ri India.
Ula pyntip ruh ban sa nang pynkylla dur shuh shuh ia ka Ward’s Lake, ha kaba la bhah ia ka T.20 Klur bad sa T.30 Klur kaban dang iaid shakhmat. Kane kaj ingkyntiew kan kynthup ia ka jingbuh ia ka ‘Laser’ ban pyninam ia ka histori jong ka Meghalaya bad ki Arena kiba pura, ban kyrshan ha ka jingpynlong ia ki prokram baroh shi snem kiba iadei bad ka kolshor.
Kane ka sngi, kala sdang da ka jingpyllait paidbah ia bun tylli ki kot kaba kynthup ia ka River Traveller – Journeys of the Tsangpo-Brahmaputra, Wad ia ka malade (Khasi), European Writing in the Khasi Hills, BSF and Meghalaya – Through the Lens of a Border Man bad From Isolation to Integration: Geopolitics of India’s Northeast.
Ha ka jingiakren halor ka mat “Life Beyond the Metro”, u nongak bad nongshna phlim u Vinay Pathak, Dominic Sangma bad Rajat Kapoor kila iakren bad ka Shahana Chatterjee, ha kaban wad ia ki lad ki lynti ha kaba iadei bad ka jinglong jingman jong ka Cinema hapoh ka ri India bad ka jingiathuhkhana da kaba pyndonkam ia ki kor Digital.
U Dominic ula kren halor ka jingioh mynsiem na ki jingiathuh khana tynrai bad ula pynpaw ruh ia ki sienjam kiba u dang shim mynta, katba u Kapoor ula kren halor ki jingtynjuh kaba mad da ki Cinema kiba laitluid watla ki don ia ka mynsiem ban shna phlim hynrei shaei pat ki don ki nongpeitkai. Ka Pathak kala pynpaw ia ka jingsngewnguh ia kane ka tamasa bad ia ka jingsngewtynnad ban shna ia ki phlim da ka jingiatreilang bad kiwei pat.
Ka poitri Garo kala shim ia ka bynta kaba kongsan ha ka jingiakren ha kane ka sngi, ha kaba u Prince S.R. Marak, Sengsime A. Sangma, Jakmatchi M. Sangma, Dr. Rhinkle Mrong bad Fivebilson R. Marak, kila khring ia ki nongsngap lyngba ka jingkren bad jingak ka jongki.
Kiwei kiwei pat ki prokram ki kynthup ia ka Anita Agnihotri bad Sanjoy Hazarika kiba la kren shaphang ki wah kum ki jaka itynnad jongka kolshor kaba dang im, u Jamling Norgay ula pynkynmaw ia ki jingsah jingkynmaw halor u Lum Mount Everest bad ka jingsngewkhia halor ka jingbun paid, ka kong Patricia Mukhim kala kren halor ka Northeast Geopolitics bad ka jingiakren halor ka Oral Tradition, ka kam pathai khubor ha ka por thma, ka jingpynsngew shaphang kiba shah iehbein bad ka jingpynwan ia ka kol Novel ka baar.
La pynkut ia kane ka prokram da kaba pynlong ia ka tem ka put bad ka rwai da ka jingiashimbynta ki nongrwai lyngba ka MGMP kaba la pynbyrngia ia ki paidbah kiba la wan sha Ward’s Lake, kaba pyni ruh ia ka kolshor kaba bunjait ha kane ka sngi ka baar.
