Nongstoiñ, Lber 10: Ka ophis treikam jong ka District Social Welfare Officer West Khasi Hills District, Nongstoiñ, ha ryngkat ka jingïatreilang bad ka District Sankal-Hub for Empowerment of Women (DHEW) bad ka One Stop Centre Mairang mynta, ka sngi ka la rakhe ïa ka International Womens Day 2025 halor ka phang ‘Accelerate Action’.
Ïa kane ka prokram la pynlong ha BDO Hall Mawthadraishan, ha ka shnong Nongshillong, Eastern West Khasi Hills District. Kumjuh ruh ha kane ka sngi la rakhe ïa ka jingdap 10 snem ka Beti Bachao Beti Padhao (BBBP) Scheme hapoh ka District Sankalp-Hub for Empowerment of Women bad kumjuh ruh ban rakhe ïa ka International Womens Day 2025 halor ka phang ‘Mothers against Drugs: A family First line of defense’.
Ha kane ka prokram la wan ban donlang ka Dr Eureka L. Mawlong Principal ka Sankardev College Shillong kum ka Kongsan, ha ryngkat ka jingïadonlang ka Kong D. Pakyntein District Social Welfare Officer, West Khasi Hills District, Nongstoiñ, ka kong Sammarbiang Thabah District Mission Coordinator, ka kong Cordially Wahlang Counsellor OSC, ka kong L. Nongrem ALADC, DLSA Nongstoiñ, ka kong Shabalin Basarngaid Gender Specialist, ki SHG, ki NGOs, ki VOs bad ki Aganwadi na ki shnong bapher bapher.
Haba kren kum ka kongsan ha ka jingïalang, ka Dr Eureka ka la ai ka jingïaroh ïa ki myn ba rim kiba la pynlong ïa ka ka jaidbynriew Khasi, ban ithuh nyngkong ïa ka kmie ban shim jait na ka kmie bad kane ka long ka jinglong kaba kyrpang kum ka jaidbynriew.
Ka la kyntu ïa baroh ki longkmie ba kin shim ïa ka sienjam ban pyntikna, ba kum ki longkmie ki don ka thong bad ka jingangnud ban seng ïa ka business, ban sdang na la ïing la sem ban pynsted ïa ka jingthmu ban wanrah ïaka imlang sahlang kaba khuid kaba don jingïaburom mar kylliang. Ka la ban jur ruh ba ka kamram ba kongsan jong ka kmie ka long ban hikai ïa ki khun na la ïing ban im ka jingim kaba bha bad ban burom ïa kiwei pat.
Kiwei pat ki ba ai jingkren ha kane ka sngi ki kynthup ïa ka kong Sammarbiang Thabah District Mission Coordinator, ka kong Cordially Wahlang Counsellor OSC bad ka kong L. Nongrem ALADC, DLSA Nongstoiñ.
