Shillong, Iaiong 15: Ngi donkam ban iaid katkum ka juk mynta hynrei ngim dei ban klet iaka jinglong tynrai namar lada ngi klet, ka jingim jong u breiw kam don jingmut.
Kane kadei ka khubor Shad Suk Mynsiem kaba 113 bala pynlong daka Seng Khasi Seng Kmie ha Madan Weiking.
Ka Shad Suk Mynsiem kaba 113, ka la sdang naduh 13 tarik bad la pynkut mynta ka sngi ka 15 tarik Iaiong haka jingshim bynta daki hajar ngut ki paidbah ka Bri u Hynniewtrep u Hynniewskum.
Iaka Shad Suk Mynsiem kaba lai sngi la pynlong man u snem da ka Seng Khasi Seng Kmie kum ka dak ban ai nguh ai dem ia la u Blei Trai Kynrad halor ki jingkyrkhu ba u la theh sei bad ruh ba un iai theh sei sha u khun bynriew.
Haba kren ha kane ka sngi khatduh jong ka Shad Suk Mynsiem, u Vice president Seng Khasi Seng Kmie Rgh BS Rumnong ula ong ba wat hapdeng ka jingbom u slap naduh ka 14 tarik mynta u bnai, hynrei ki nong shad shynrang bad kynthei ki la ia tuid sha lympung Weiking ban shim bynta haka jingshad.
Naduh ka sngi sdang jong ka Shad Suk Mynsiem haduh ka sngi kut, ki nongwan shim bynta ban shad ki long baroh 1636 ngut kynthup 815 ki shynrang bad 821 ngut ki kynthei.
“Kum ba ju long man u snem, ka jingwan shim bynta ki nong shad ka iai kiew bad mynta u snem wat hapdeng ka jingthrp u lap bah, u phria bad lyer ba jur bad ka jingsniew ka suin bneng, kane kam shym la pynduh mynsiem iaki nongwan shad bad iaki nongwan peit kai” la ong u Rgh BS Rumnong.
U Rgh BS Rumnong ula “Ka jing Shad Suk Mynsiem kadei ka khubor ban don ka jingngeit kaba bha ha baroh ki khep bad ban kmen ka mynsiem ia kaei kaei kaba u Blei Trai Kynrad ula theh”.
