Nongstoiñ, Nohprah 11: Ki paid riewngeit ka Balang Katholik mynta ka sngi U Blei, ki la ïa tuid sha ka proseshon Ïukharis ka Jyllaniam Nongstoin ïa kaba la pynlong ha ka Divine Savior Parish Nonbah, New Nongstoiñ, ha kaba ki riewngeit na ki parish bapher bapher kna South West Khasi, Eastern West Khasi, West Khasi Hills District bad na kiwei kiwei ki District ki la wan ban ïashim bynta.
La sdang ïa katei ka jingleh niam da ka Mass Bakhuid ïa kaba la pynlong ha phyllaw ka ïingmane bah jong ka “Shrine” jong ka Dohnud Bakhuid tam U Jisu” Nonbah Parish. La tyrwa ïa ka jingkñia Mass Bakhuid da u Rev. Fr. Anselm Nonglang ha ka jingïadonlang ryngkat kiwei kiwei ki lyngdoh sohblei, kiba kynthup ïa u Fr. Wilbert Marweiñ Parish Priest ka Nonbah Parish bad kiwei kiwei.
Haba phriang ïa ka ktien U Blei da u Rev Fr. Anselm Nonglang, Diocesan Administrator jong ka Jylla niam Nongstoiñ u la ong “ka kamram jong ki nongsharai ka dei ban leit wad ïa kiba la jot ka jingim, kiba la shah kyntait ha ka imlang sahlang, kiba shitom ba pang bad kiba donkam shisha ïa ka jingïarap”.
Hadien ka Mass Bakhuid la sdang ïa ka jingïaid proseshon Ïukharis na ka phyllaw Ïingmane ter ter sha ïew bad phai biang pat sha Ïingmane bad la pynkut ruh da ka jingmane sakrament.
Ha kane ka sngi u Rev. Fr. Anselm Nonglang, ula pyllait paidbah ïa ka kot kaba kyrteng ka “Umpohliew Jingïaroh ”, kaba la thoh da ka kynhun ki nongduwai Nongstoiñ Diocese Charismatic Group.
Ha kane ka sngi la ïadonlang ruh U bah Macmillan Byrsat MLA ka Nongstoiñ, bah Gabriel Wahlang MDC ka Nongstoiñ, Bah Carnes Sohshang MDC Mawkyrwat, ki kyrtong na ki seng saiñ pyrthei bapher bapher kynthup ïa u Macmillan Kharbani, bah Polestar Nongsiej, Bobby Kharsandi bad kiwei kiwei kiba la wan ban sakhi lang ïa katei ka sngi kyrpang jong ki paid riew ngeit ka Balang Katholik.
