Shillong Rymphang 29: U Nongialam ka BJP bad MLA ka South Shillong Bah Sanbor Shullai ula kyntait ban pdiang ia ki jingkynnoh u Nongialam ka Liang Pyrshah Bah Ronnie V Lyngdoh halor ka jingong ba ym ju da poi sha iingdorbar thawain ka jylla bad ba ym ju kren eiei hapoh ka Dorbar.
U Bah Ronnie Lyngdoh ha ka sngi Balang ula buh jingkylli ia u Bah Sanbor halor ka jingpep ban wan sha ka dorbar ha ka Dorbar Mang Tyngka kaba dang shu dep bad ka jingbym kren eiei hapoh ka iing dorbar thawaiñ.
U Bah Sanbor ula ong, ka jingkynnoh u Nongialam ka Liang Pyrshah kam long kaba shisha bad ula pynshai ba ula leit iashymbynta ha ka Dorbar Mang Tyngka bad ula pynshai ruh ba ha ki snem kiba la dep, la bunsien ula kren bad rah ia ki mat kiba kongsan hapoh ka iingdorbar, la kadei ka jingeh kaba mad da ki paidbah jongka Constituency ha ka por ba saphriang ka khlam COVID-19 ne kiwei kiwei.
Ula ong, ba dei lyngba ka jingkren jongu, kaba la pynlong iaka sorkar MDA kala bhah mar T.50 Lak ia kawei ka Constituency ha ka por ka khlam COVID.
U Bah Sanbor ula ong, ba u don ha ka Liang Synshar bad ula ong ba ula mih bha shakhmat ha kaban rah ia ka mat kaba iadei bad ka CAA, UCC, ILP bad kiwei kiwei ki mat.
“Hadien ka jingshimkhia ka jong ngi, ka sorkar India kala rai ban ym pyntreikam shuh ia ka CAA ha ki jaka kiba hap hapoh ka Sith schedule” ong u Bah Sanbor Shullai.
U Nongialam ka BJP ula ong, halor ki mat kiba iadei bad ka constituency ka jong u, u leit ban kren ia ki tnad bapher bapher, ki heh ophisar, ki myntri sorkar bad ha u Myntri Rangbah ban pynpaw ia ka jingdonkam jong ki paidbah ka constituency bad kumta ym da donkam than ban kren hapoh ka iingdorbar.
Ula ong, ba ula iaid da ka jingmut, kata ban pyni da ka kam ban ia kaba kren da ka ktien, namar ka kam ka kren kham jam ban ia ka ktien, kumta ym sngew ba ka long kaba donkam ban kren than.
U Bah Sanbor ula kyntu ia ki nongthep vote ba kin ailad ia ka BJP ha ka elekshon MP Lok Sabha.
“Ailad iaka BJP shisien bad ianujor bad ka jylla Assam, peit ia ki kam ki jam bad ki jingtrei bapher bapher kiba la wanrah bad pyntrei, hynrei ka nongbah Shillong ka neh hi kumjuh beit” ong u Bah Sanbor.
Lah ban kdew ba u Bah Sanbor u dei u dkhot jong ka sorkar synroplang ka Meghalaya Democratic Alliance (MDA) kaba iatreilang hapdneg ka seng NPP, UDP, BJP, HSPDP bad kiwei kiwei.
