Shillong, Nailar 28 : U Myntri ka tnad jngohkai Bah Paul Lyngdoh ha ka sngi Balang ula ong ba ka kam jngohkai ka dei uwei na ki mawbyrsiew ka ioh ka kot jong ka Jylla Meghalaya.
Haba jubab ia ka short duration discussion ha Iingdorbar,u Bah Paul ula ong ba ka jingiohi jngai jong ka Tnad jong u ka long ban buh ia ka Jylla kum kawei na ki jaka wan shangkai ba khring bha bad ba kyntiew ia ka kam jngohkai kaba neh bad kaba don jingkitkhlieh, ka ban ai jingmyntoi ia ki nongwan shangkai bad ki trai shnong.
La antad ba kumba 50,000 ngut ki briew ha ka Jylla kila shaniah ha kane ka kam ban kamai jakpoh.
“Haba sngewthuh ia kane, ka Sorkar Jylla kala kut jingmut ban pynroi ia ka kam jngohkai kum ka lad ban aikam aijam, ban nang pynbun ia ki kam kamai jakpoh bad ban kyntiew ia ka rukom im jong ki nongshongshnong ka Jylla” ula ong.
“Baroh ngi tip ba ka kam jngohkai kadei ka lad thaw kam bad kaba pyniar iaka jingaikam aijam kaba don ruh ia ka kabu ban long kawei na kita kiba noh synniang ia ka GDP. Ban pynurlong ia ka thong ka jong ngi, ngi lah dep ban ithuh ia ka jingdonkam ban thaw ia ki jingtei kiba kongsan ha ki jaka kiba la don lypa bad kiba thymmai kiban kynthup ruh ia ka jingtei ia ki jaka sah kiba thymmai ban pynbha ia ki jaka kiba don ha ki jaka kiba itynnad bad ban kyntiew ha baroh ki liang khnang ba ka jingwan ki nongjngohkai kan long kaba kin sah jingkynmaw bad kan long ruh da ka jingthmu ban pynlong ia ka Meghalaya kum ka jaka kaba kongsan tam kaban don ia ki mar ki mata, ka Adventure Tourism, Experiential Tourism bad ka Cultural Tourism,” ong u Bah Paul Lyngdoh.
Ula bynrap ruh, “Ka sorkar kala dep ithuh, ba ka long kaba donkam ban bhah tyngka shuh shuh na ka bynta ban tei ia ki jingtei. Kumta ngi la dep ban pynwandur ia ka jingthmu ban pynmih ia ki jingdon jingem ym tang na ka bhah tyngka jongka sorkar jylla hynrei wat ruh na ki skhim jong ka sorkar pdengbad ki Externally Aided Project (EAP)”.
Kawei na ki sienjam kiba kongsan ha kaba iadei bad katei ka bynta kadei ka jingpyntreikam ia ka Meghalaya Eco Tourism Infrastructure Development Project, kaba dei ka Externally Aided Project hapoh jongka New Development Bank.
“Ha ka jingbhah tyngka kaba kot T.730 Klur, katei ka project ka thmu ban tei ia ki jingtei kiba don nam ha ki jaka jngohkai kiba kongsan kum ha Sohra, Shillong bad Tura. Nalor kane, ngi lah ioh ruh ia ka bhah tyngka kaba T. 60.29 Klur lyngba ka Swadesh Darshan 2.0 naka bynta ban kyntiew ia ka Meghalayan Age Cave Experience & Water Falls Trails ha Sohra,” la ong u Myntri Sorkar.
Ula iathuh shuh shuh, “Ngi la iohpdiang ia ka bhah tyngka na ka Ministry of Tourism kaba T. 50 Klur hapoh jongka Challenge Based Destination Development, kaba dei ka skhim jong ka Swadesh Darshan 2.0.”
Ula ong ba ka sorkar Meghalaya ka iengskhem ha kaban bteng ban kyntiew bad pynbha ia ka kam jngohkai kaba ki tyrwa, ngi pynleit jingmut na ka bynta ban wanrah ia ki lad kiba thymmai bad kiba kyrpang kaban long na ka bynta ki nongjngohkai na kiwei pat ki ri bad kiba napoh ka ri, nuksa na ia ka Jaintia Hills kaba la kiew kynsan kum ka jaka jngohkai kaba ki nongjngohkai ki sngewtynnad ban leitkai ha ki jaka kiba don ha Ialong, Syntu Ksiar, Krang Suri, Shnongpdeng, Darrang bad Iooksi.
U Myntri ula pyntip ruh ba ka sorkar kala sdang ruh ia ki prokram kiba thymmai ban kyntiew ia ka kam jngohkai ha ka jylla bad ka bynrap ba ka Meghalaya Home Stays Scheme kaba iaid ryngkat bad ka PMEGP ka ai haduh 70% ka Subsidy kaba T.10 lak ban kyntiew ia ka jingtei ia ki Home Stay ha ka jylla kaba pynshlur ruh ba kan don ka jingdonbynta lang jong ka shnong ka thaw ha ka kam jngohkai.
Baroh ki don 633 tylli ki Home Stay kiba la dep ban bhah tyngka naduh ba la sdang ia katei ka scheme.
Lyngba ka Chief Minister Elevate program la buh ia ka thong ban kyntiew ia ka jingsenkam lajong da ki samla ka jylla ha kaba la ai jingkyrshan da ka song tyngka bad kumba long mynta, kila don 50 ngut ki nongseng kam lajong kiba la ioh jingmyntoi naduh ba la sdang ia katei ka scheme.
U Myntri ula pynpaw ruh ia ka jingsngewkhia ia ka jingjia haka Lad Umtyngar ha ka 30 tarik u Naitung bad katei kala ktah jur ia ka kam jngohkai.
Ula pyntip ba katkum ki kaiphod la kdew ba kala don 30% ka jingpynsangeh noh ia ka jingbat ia ki jaka sah ha ki Hotel ha ka 26 tarik u Naitung bad 50% ka jingpynsangeh noh ia ka jingleitkai bad kiwei kiwei ki kam ha ki sngi kiba bud. Katei ka jingjia kala lam sha ka jingsngewkhia ia baroh kiba donbynta ha ka kam kaba iadei bad ka kam jngohkai.
Ka Tnad Tourism kala shimkhia mardor da kaba pynlong ia ka jingialang ha ka 14 tarik u Nailar bad ha katei ka jingiamir jingmut la iatai sani halor ki mat kiba kongsan kaba kynthup ia ka jingdonkam ban don ia ki surok kiba bha, ka bording elektrik, ka jingtreikam jong ka kor Internet, ka jinglum jinglang ha ka rukom kaba biang iaki niut ki nier, ki lad ban pyniaid iew, ka jingtbit bantreikam, ban pynkylla ia ka rukom pyrkhat pyrdaiñ, ban iada ia ki nongjngohkai na ki riewshimkabu ne nongleh thok, ka jingkamai ki kali shimet kum ki kali kamai bad kiwei kiwei.
Ki nongiashimbynta kiba don bynta ha ka kam, kila banjur ia ka jingdonkam ban iatreilang hapdeng jong baroh lang ban thaw ia kaei kaei kaban long kyrpang bad kaba bha ia ki nongjngohkai kaba kin ioh ban mad bad kumjuh ruh iaka jingdonkam ban don ha kawei ka rynsan ia baroh kiba don bynta ha ka kam jngohkai.
