Nongpoh, Nohprah 08 : U Myntri ka Tnad Pule Puthi ka Jylla Rakkam A Sangma ula ong ba ka jingnang jingstad kam shong ha ka jingdon ki Iingskul kiba heh bad paka hynrei ka shong ha ka jingtrei shitom jongki Khynnah bad ki Nonghikai.
U Rakkam ula kren ia kane haba pynhap pyrda ia ka jingrakhe dap 50 snem jong ka skul Nepali Secondary School hynne ka sngi Thohdieng, kaba la pynlong ha District Library ha Nongpoh.
Kane ka jingkren kala mih ruh hadien ka jingjurip ia ka Iingskul jong kane ka skul ha ka jingiadonlang u MLA ka Nongpoh Bah Mayral Born Syiem, u ADC ka Ri-Bhoi Manish Kumar, ki bor pyniaid ka Managing Committee ka Skul bad kiwei kiwei.
“Ha ka jingjurip jong nga ia ka skul, nga shem ba kam pat don ia ki jingtei kiba heh hynrei nga ong ia phi ba ka jingnang jingstad kam shong ha kajingdon iaki iingskul kiba heh hynrei ka shong ha ka jingtrei shitom jong ki khynnah skul lem bad ki nonghikai” ong u Myntri.
U Myntri ula ai ka jingiaroh ia ki bor pyniaid jong ka skul kiba la lah ban jam sha une u mawmer ba 50 snem ban pynsaphriang ia ka jingnang jingstad ha ka thain Nongpoh bad khamtam ei ban ai ka jingshakri iakito ki khynnah kiba wan na ki longiing longsem kiba duk ba rangli.
“Ka jinglen lade naduh ki nongseng, ki nonghikai bad kito kiba don bynta ban pynieng ia kane ka shlem ai jingnang jingstad, ka long kaba seisoh da ka jingjam sha une u mawmer” ong u Rakkam.
La pynphuh pynphieng ia kane ka jingrakhe da ka jingiashimbynta jong ki khynnah skul bad nonghikai ha ki jingshad jingrwai bad ki jingput jingtem bad la pynlait ruh ia ka Souvenir jong ka jingrakhe Golden Jubilee ha ryngkat ka jingpynkup burom ia ki katto katne ki nonghikai bad khynnah skul.
