Shillong, July 16: U Special Officer uba l a shah thung ha ka Meghalaya High Court u Subhasis Chakrawarty hynne ka sngi Balang, ula bthah ia ki bor pyniaid district jongka East Khasi Hills ban pyniaid shakhmat ia ka jingthmu ban pynkynriah ia ki nongshong bad ki nongdie madan ha ka thain Khyndailad katkum ka jingbthah jong ka iingbishar.
Haba iakren bad ki nongthoh khubor hadien bala wai ka jingialang kaba la long ha ophis treikam jongka Deputy Commissioner, u Chakrawarty ula ong, ba ka jingialang kala long kaba seisoh hapdeng ki kynhun bapher bapher, kumno ban pyniaid shakhmat ia ka jingpynkynriah bad ia ka jingai ia ka Certificates of Vending (CoV).
“Kumta ki bor pyniaid district kin iaid shakhmat (ban pynkynriah ia ki nongdie madan) katkum ka rai kaba la shim halor kane ka mat” ula ong.
Ha kaba iadei bad ka jingkylli, u Special Officer ula pynpaw ba yn pyndonkam da ka ap bad ban peit ne ka “wait-and-watch” bad ka ong “To ngin ia peit shwa kumno ka iaid shakhmat. Ngin sa tip shaphang ka jongka katba kane ka kam ka dang iaid shakhmat”.
Ha kane ka jingialang la wan iashimbynta da ki ophisar jong ka district, Shillong Municipal Board (SMB), ki dkhot jongka Provisional Town Vending Committee (PTVC) bad ki dkhot jongka Meghalaya and Greater Shillong Progressive Hawkers and Street Vendors Association (MGSPHSVA).
Ha ka 13 tarik u Naitung, u Special Officer ula bthah ia ki bor pyniaid district ban ym pyniaid shakhmat ia ka jingkyndang ia ki nongdie madan ha Khyndailad da kaba pynpaw ia ka hukum kaba la pynmih da ka iingbishar ha ka 3 tarik u Naitung, kaba la bthah ba dei ban pynkhreh ia ka thup kyrteng ne ki nongdie madan kiba la ioh ia ka lisen ha ryngkat ka jingiasyllok bad ka Hawkers’ Association bad ki bor kiba dei khmih.
Ka thup kyrteng katkum ka jingbthah ka iingbishar, kadei kaba ym pat dep ban pynkhreh bad kane kala pynlong ia ki nongdie madan ban ym tip ia ka jinglong jingman ka jongki.
U Special Officer ha ka shithi kaba la phah sha ka Deputy Commissioner ula iasaid ba ka jingkyndang ha kane ka khep kaba mynta kan long ka jingpynkhein ia ka jingbthah ia ka hukum jong ka iingbishar.
Ha ka hukum kaba la pynmih ha ka 3 tarik u Naitung, ka High Court kala ong, “(ii) Hapoh jong u Special Officer ha ryngkat ka jingiasyllok bad u General Secretary, Hawkers’ Association, ki bor kiba dei khmih bad ki pulit kidei ban pynkhreh ia ka thup jong ki nongdie madan kiba la ioh jingbit ne lisen ia kaba la ong ba ki don kumba 349 ngut.”
Ka iingbishar kala bthah ba ki nongdie madan kiba la ioh jingithuh dei ban shah die jingdie ha ka thain Police Bazar na ka bynta katto katne kynta (12:30 mynsngi haduh 2 baje mynsngi bad 7:30 mynmiet haduh 9 baje mynmiet), kata da kaba shim ia ka jingkular ba kim dei ban shong palat ia ka por kaba la buh ne ban pynthud ia ka leit ka wan ki kali ne ki briew kiba iaid ba ieng. Ki nongdie madan ki bym pat don ia ki lisen yn ym shah ban shong die jingdie ha katei ka jaka.
Ka iingbishar kala bthah ruh ia ki nongdie madan ba kidei ban kynriah noh sha ki jaka kiba la pynkhreh ban shong die jingdie da ki bor sorkar bad kiwei pat ki nongdie jingdie ki lah ban aplai ia ka lisen.
La bthah ruh ia u Special Officer ban pynthikna ba kan don ka shongsuk shongshngain ha kaban pyntreikam ia katei ka hukum jong ka iingbishar bad ban aiti ia ka kaiphod hashwa ka 5 tarik u Nailar 2025.
