Shillong, Risaw 17 : Ka kynhun rwai pop na England-BLUE kala pynkhreh ialade ban wan pynlyng-uh ia ki riew ieid jingrwai ka Jylla ha Shillong ha ka 11 tarik Nohprah, ka ban dei ruh ka live show ba nyngkong eh ha India.
Kane ka dei shibynta jong ka 25th Anniversary World Tour bad ka kynhun kan leit ruh ban rwai ha kiwei ki Sor kata ha Gangtok la 13 tarik Nohprah bad ha Bangalore la 14 snem Nohprah.
Ka jaka ba nyngkong eh ha kane ka jingwan rwai ha India kan dei ha Shillong, kaba la bna nam kum ka Rock Capital ka India. Ia kane ka concert yn pyniaid da ka Fukra, ka kompani pynbyrngia kaba dei na Assam.
Ka BLUE kala pynbna nyngkong ban wan sha Shillong ha u snem 2023 hynrei la pynkynriah noh hynrei mynta u snem, kane ka kynhun rwai kan wan ha ryngkat ki jingpynkhreh kiba biang nadong shading.
Kane ka concert la khmih lynti ba kan khring ia ki riew ieid jingrwai na kylleng ki Jylla ka Thain Shatei Lam Mihngi-ia kaba la kular ba kan long kawei na ki international pop concert ka ban sa sah jingkyn maw ha ka thain.
Hadien ka Shillong, ka Kynhun kan leit ban rwai sa ha Gangtok, ka ban dei ruh ka sien nyngkong ban long ki international concert ha Sikkim. Kane ka concert kan long ha Paljor Stadium ha ka 13 tarik Nohprah.
Kane ka concert kan dei ruh shibynta jong ka jingrakhe ka Sikkim ia ka jingdap 50 snem. Ka kynhun BLUE kan kiew ryngsan ha ryngkat ka kynhun K-Pop Everglow.
Ka kynhun kan pynkut ia ka tour ha India da ka concert ha Bangalore ha ka 14 tarik Nohprah ha Phoenix Marketcity, ka ban long hapoh ka kyrteng Blue Christmas ha Bengaluru.
