Shillong, Jymmang 04 : Ka Indian Council of Medical Research (ICMR) kala pyntip ba ka Jylla Meghalaya kala wan ba-ar ha ka jingdon jong ki nongpang bampong napdeng ki Jylla hapoh ka Ri India.
Ia kane la pyntip da ka Dr Anisha Mawlong, HoD ka Tnad Oncology Department, ka Civil Hospital Shillong haba iakren bad ki lad pathai khubor hynne ka sngi saitjain ha Pinewood.
Kat kum ka jingong jong ka, ka Meghalaya kala wan ba nyngkong ha India ha ka jingdon ki nongpang bampong kiba ioh ia ka jingpang na ka jingdih duma bad bam duma.
“Katkum ka ICMR baroh ngi tip baka Meghalaya ka wan ba ar napdeng ki Jylla hapoh ka Ri, ba bun kiba ioh pang bampong. Ka jingiohpang hapdeng ki shynrang ka long 227.9 ngut naki 1 lak ngut katba ki kynthei ka long 118.6 ngut naki 1 lak ngut. Ki shynrang ka long 1 na ki 5 ngut bad ki Kynthei ka long 1 na ka 9 ngut ” la ong ka Dr Anisha.
Ka pyntip ruh ba ka Meghalaya ka wan ba nyngkong ha ka jingdon jong ki briew kiba iohpang bampong u tyngkro (foodpipe cancer).
Haba pynpaw ba ka jingioh pang bampong kam dei tang ha jaka sor hynrei kala purr uh sha ki thain Nongkyndong, ka Dr Anisha kala ong “Kum ka jingpang Hypertension bad Diabetes kiba pyniap briew jar jar, ka bampong ruh kadei ka jing pang ba pyniap jar jar iaki nongshongshnong ka Meghalaya”.
Haba iadei bad ki sienjam baka Sorkar Jylla kala shim ban rat dyngkhong iaka jingpang, ka Dr Anisha kala pyntip ba ha Shillong ki don 2 tylli ki Hospital ban sumar iaki ba pang bampong bad kine ki dei ka Shillong Civil Hospital bad ka North Eastern Indira Gandhi Regional Institute of Health and Medical Sciences (NEIGRIHMS).
Kala iathuh ba ka Cancer Wing jong ka Civil Hospital Shillong ka don 90 jingthiah bad shen kane ka hospital kan sa ioh ia ka Machine Linear Accelerator bad ka Bracket Therapy ban sumar iaki nongpang.
“Kum ka sienjam ban iakhun ia kane ka jingpang, ka Sorkar Jylla kala pyntreikam daka Meghalaya Cancer Prevention and Early Detection Mission bad lyngba kane ka Mission, yn eksamin iaki paidbah ban lap haka por ba biang lada ki don jingpang bad ban ioh ai pat ia ka jingsumar iaka jingpang” kala ong.
Ka Dr Anisha kala iathuh ba kum shibynta jong ka Mission, ka Tnad ka Koit ka Khiah ha u bnai Naiwieng bad Nohprah 2023, kala pynlong ia ka jingwad bniah daka ba leit sha ki 11 tylli ki District ka Jylla ban eksamin ei iaki paidbah ban lap, mano kiba lah ban don ka jingpang bampong.
“Naki 11 tylli ki District, tang 1093 ngut kila wan shakhmat ban eksamin bad napdeng kine, la lap ba 15 ngut ki don jingpang bampong bad 71 ngut ki dei kiba hap ban eksamin bniah ha Shillong Civil Hospital” kala ong.
Ka Dr kala iathuh ba hadien bala eksamin bniah iaki 71 ngut ha Shillong Civil Hospital, la lap ba napdeng kine, 40 ngut ki don jingpang bampong bad lada khien kyllum lang napdeng ki 1093 ngut ba phah eksamin paidbah (Screening), 55 ngut ki don jingpang bampong.
“Nga kyntu iaki paidbah ban wan shakhmat ban phah eksamin, shisien haka lai snem ban lap kloi iaka jingpang bampong lada ka don ha ka met jong ki, namar lada lap kloi, ka jingsumar kan long kaba suk, bad kito kiba don ka jingpang, kin ioh ka jingkoit ba pura” kala ong.
 kala pyntip ba ka Jylla Meghalaya kala wan ba-ar ha ka jingdon jong ki nongpang bampong napdeng ki Jylla hapoh ka Ri India.){kind=link}