Shillong, Nailar 09: Ka jingioh lad da ki briew kiba dei nabar ri, ban ioh rung suk shapoh u pud u sam jong ka ri India, lyngba ka jylla Meghalaya ban leh ia ki sniew bad ki kam pyntriem ka buh shisha ia ki paidbah ha ka jingma ba khraw bad khamtam eh ha ki shnong khappud jong ka South West Khasi Hills District.
Hynne ka sngi Saitjain, ki Pulit ka SWKHD hapoh ka jingialam jong u Officer in Charge ka Nonghyllam Police Station ha ryngkat bad ka jingiatrei lang bad ki shipai Border Security Force kila ioh ban kem ia saw ngut ki briew kiba na Bangladesh bad kurup ruh ia ki tiar siat kum ki suloi bad kiwei de ki tiar pynmynsaw.
Haba iakren bad ka Shlem, u Superitendent of Police ka SWKHD u Bah Banrap Jyrwa u la iathuh ba ia kine ki saw ngut la ioh ban kem da ka jingiarap ki paidbah bad kumjuh ruh na ki BSF kiba don hapoh ka dong ka thain Khonjoy.
“Ia uwei napdeng kine ki saw ngut la ioh ban kem da ki paidbah katba u dang phet rieh sha khlaw katba ia ki lai ngut pat la ioh ban kem da ki Pulit bad ki shipai BSF kiba dang phet rieh hadien ka jingsiat pynma sha suin da ki Pulit ha Nonghyllam PS katba ki dang wan ban pyntriem ha kane ka dong ka thain” ong u SP.
Kaba kham phylla na kane ka jingshah kem bad shah kurup ki tiar siat, la lap ba uwei u briew ia uba la tip kyrteng kum u Marufur Rahman katkum ka Identity Card ka paw ba u dei u Pulit jong ka ri Bangladesh ne (Bangladesh Police) bad kane kala pynsyier bad buh jingma ia ki paidbah.
Katkum ka jingtip ba la iohlum la ong, ka kynhun ki nongtuh na Bangladesh kam shym la don kano kano ka jingsalia ban tuh ha ki por mynsngi ne tuh pyrshah haba don ki trai, kum ia u dewiong, ki mawshun, ki kwai nalor kiwei pat namar ba kila don ia ki suloi ryngkat bad ki.
Na ka liang u SP u Bah Banrap Jyrwa u la iathuh ba mynta ka sngi, ha ka por 2.15 nohphai sngi la ioh jingtip lyngba u Bah Telang Pde ba ki don ki kynhun riew sniew kiba la suba jur ba ki lah ban dei na Bangladesh kiba la rung sha ki bynta jong ka shnong Khonjoy.
Ki Pulit mar ia ioh ia kane ka jingtip mar mar kila leit sha ka shnong Khonjoy bad kine ki riewsniew kiba don 8 ne 9 ngut tang shu iohi ia ki Pulit kila phet krad noh sha Khlaw.
Hapoh ka jingialam jong ka Honghyllam Police Station kila bthah ia kine ki riewsniew ban sangeh bad kila siat kuli arsien sha suiñ ban pynma, hynrei kine ki briew ki khlem sangeh satia bad kila phet noh sha khlaw.
Hadien ba la ioh ban kem ban kurup ruh ia ki tiar pynmynsaw ba shyrkhei, ki pulit mynta ki dang pynkhlain shuh shuh ia ka jingpahara ha katei ka thain ban ioh kem ia kine ki briew kiba phet rieh, katba ia kiba la ioh kem pat la ialam noh sha jaka ai jingsumar namar ba kila mynsaw bad hadien ki pulit ki lah ban rah noh sha iing kashari ban shah tian bishar ia kine ki nong Bangladesh.
Hashwa jong kane, u SP ula iathuh ba mynnin ka miet ha ka por shi baje, kane ka kynhun ba 8 ne 9 ngut kila wan ha ka shnong Rongdangai bad rung ha kawei ka dukan ba sah miet da u Balsrang A Marak kaba dei ka dukan jong ka Lakme A Marak.
Ha ka por kumba 1 baje mynstep kynsan kynsan ki 8-9 ngut ki briew bym lah ban ithuh dur khmat ki la rung shapoh ka dukan bad kila pynap pistol na khlieh ia u bad pan ia u nombar phone jong u trai dukan, hadien la teh kti noh ia u Balsrang Marak bad ki la ialam ia u sha ka shnong New Rongdangai.
Katba kane ka kynhun pyntriem na Bangladesh ka dang ia pyrkhat ban ot ryndang noh ia une u lanot bad ban pyniap ia u. Kynsan kynsan ula iohi ba ki 6 ne 7 ngut ki dkhot ki dang iaid suki suki nadien, bad haba iohi ia kane ka ula ioh lad ban pyllait noh ialade na kti ba ula shah teh da ka jain ‘Gamcha’ bad kynsan kynsan ula phet noh bak sha ka iing jongu ha ka shnong New Rongdangai bad u khang syndon ia ka jingkhang, hynrei kine ki riew sniew kila kthong kylla ia u bad tied ia ka jingkhang na shabar bad sdang ruh ban synreit kuli.
Kham hadien kiba ha iing kila sheptieng bad kila plie noh ia ka jingkhang bad mar mar ki rine ki riewsniew kila rung sha iing bad sdang ka shoh ka dat ia u Balsrang Marak bad hadien ba la pyllait ia ki kti ba la teh kila ong, ia kiba ha iing ban shim ban phah leit sumar.
