Nongpoh, Nailar 12: Namar ka jingnang ïai mih ki jingkynthoh pyrshah ïa u nongmihkhmat ka Mawhati Konstituensi Bah Dasakhiatbha Lamare ba um shem la treikam satia hapoh kine ki 4 snem tam ban wanrah ïa ka roi ka par hapoh ka Constituency, ka National People’s Youth Front, Mawhati Block hynne ka sngi ka la pynshai ba kine ki jingkynthoh baroh ki long ki bym don nongrim satia bad kiba la shu kynnoh tang ban pynthoh bria ïa u MLA.
“Baroh ki jingkynnoh ki dei tang ki jingbishni bad ki dei tang ki jingpynthohbria ia u MLA kiba khlem don nongrim satia” ong u President ka NPYF, Mawhati Block Bah Hilary Shadap, Working President Bah Pynbhalang Syiem bad General Secretary Bah Nicolas Mallai.
Kine ki Nongialam ka NPYF kila pynksan ba u Bah Dasakhiat ula treikam bha kum u MLA ha kine ki snem bala leit noh bad ula wanrah ruh ia shibun ki kam pynroi khamtam eh ban pynbha ia ki surok paidbah kiba don ha kylleng ki kyntoit jong ka Mawhati Constituency.
“Ki paidbah ki la sakhi hi ba u MLA u la pyni ïa ki kam jong u ym tang ban iarap ia ki paidbah kiba mad jingeh hynrei ban wanrah ruh ïa ki skhim pynroi ha ki shnong ki thaw ka Mawhati Konstituensi bad ruh ban ïakhun kumno ban pynïoh ïa ka jingpynmang pisa na ka sorkar ban tei thymmai ïa ki katto katne tylli ki surok”, ong ki nongïalam.
Kine ki nongïalam, ki la pynpaw ruh ba da ka jingtreishitom u MLA, ka sorkar jylla ka la dep ban mang pisa na ka bynta ki 3 tylli ki surok ba kongsan ha ka thaiñ Mawhati ba kynthup ïa u surok na Liarbang sha Sabuda ba jngai kumba 10km ba la mang haduh 18.5 klur, u surok na Khyndewso sha Jingkieng Umkhen ba la mang pisa haduh 20 klur ba jngai kumba 10km, bad u surok na Umsning sha Sonidan ba jngai kumba 40 km ba la mang pisa haduh 114 klur.
“Kat kum ka jingtip ba ngi ioh, ka tnad PWD kan sa sdang noh shen ban pyntrei ia kine ki surok nalor kiwei kiwei ki kam pynroi” kila ong.
