Shillong, Kyllalyngkot 07: U Chief Secretary ka jylla u Bah D.P. Wahlang hynne ka sngi Baar, ula pynpaw ba ka jingiakren bad ka kynhun kieng atiar Hynniewtrep National Liberation Council (HNLC) ka dang plie, watla kala don noh ka jingpynsangeh shipor ia ka jingiakren.
“Ha kawei ka por, ka HNLC kala thrang bha ban bteng ia ka jingiakren” ong u Bah DP Wahlang. “Hynrei kila don ki mat kiba kyllain na ka liang ka jongki bad ka jong ngi bad ngim shym la poi sha u pud ban iasngewthuh. Ngi lah kyrpad ia ki ban wanphai biang, ban don ia ka jingiakren kaba biang hapdeng ka jongki bad ban wan phai biang hadien ba kila ioh ia ki jingshai bad ia ka nongrim na ka bynta ban ia sngewthuh”.
Haba ka HNLC kala pynlong ia la ka jingialang, naduh katei ka por, u Bah Wahlang ula ong ba kim shym la wanphai ban bteng biang ia ka jingiakren.
“Ngi dang ap, ki jingkhang ki jong ngi ki dang plie bad kata ka long kaba kongsan tam” ula ong.
U Chief Secretary ula pynpaw ba ka sorkar ka kloi ban iakren, ki don katto katne ki mat ki long ki bym lah ban iapein, khamtam kito kiba kynthup ia ka Ministry of Home Affairs jong ka Sorkar Pdeng.
“Ki don ki bynta ki bym lah ban ia pynbeit bad halor kitei ngim lah ban iapein. Ia kiwei pat ki mat kidei kiba lah ban iapynbeit” ula ong.
Ha kaba iadei bad ka jinglong jingman ka shongsuk shongsain, u Bah Wahlang ula ong ba u snem 2024 udei u snem uba don ia ka shongsuk.
“Ngim shym la don ia ki mat kiba heh bad baroh ki long kiba la lah ban tehlakam” ula ong, bad ka jingskhem jong ka sorkar kala pynlong ruh ban ailad ia ki kam pynroi ba kin iaid beit iaid ryntih ha baroh ki liang.
“Ka jinglong jingman jongka shongsuk shongsain kala ai jingmyntoi ia ki kam pynroi jong ka sorkar bad ia ki nongshong shnong ka jylla” ula bynrap.
Haba peit nangne shakhmat, u Bah Wahlang ula pynpaw ia ka jingskhem jingmut na ka bynta u snem 2025, da kaba banjur ia ka jingkongsan ban pynneh ia ka shongsuk bad ka jingkiew shaphrang jong ki kam pynroi ha ka jylla Meghalaya.
“Ngi kyrmen ba kane ka jingsuk jingshngain kan iai bteng, namar ka long kaba kongsan ban kiew ka bha ka miat jong ki paidbah bad ka roi ka par jong ka jylla baroh kawei” ula ong.
