Shillong, K’lyngkot 31 : Ka National People’s Party (NPP) kala kala plie kylluid ia ka jingkhang ban iatreilang bad synrop lang lada donkam ha kaban thaw ia ka Sorkar Jylla kumba long ha u snem 2018.
Baroh ki seng sain pyrthei kila iaid shaid shaid mynta ha ka jingialap elekshon ha kylleng ki jaka ka Jylla ban pynkhreh ia ka elekshon ban long ha ka 27 tarik u Rymphang.
Baroh ki paralok ba iatreilang ha ka MDA- ka BJP,UDP,PDF, HSPDP bad kiwei kiwei kila ieng iakhun marwei ia kane ka elekshon ban wan khlem ka jingiatehlok lypa.
Haba kren sha ki nongthoh khubor, u National President ka NPP bad Myntri Rangbah ka Jylla Conrad K Sangma ula ong “Lada ngi iohi ba ka NPP kam ioh ia u nombor ban thaw sorkar (full majority) bad lada donkam ia ka jingkyrshan, ngin sa iakren bad kiwei kiwei ki seng sain pyrthei. Ka lynti ka don hynrei kumba long mynta, ngi la leit sha ki paidbah halor ki nongrim ba ngi ieng bad ka jingngeit lem bad ka jingkyrpad ban ioh ia ka jingjop ba bun eh.
Kane ka jingkren u Conrad kala mih tang shisngi hadien ba u National Vice President ka BJP bad ba khmih ia ka Meghalaya u M Chuba Ao u khlem lah pynthikna iaka lynti la ka BJP kan dang iatrreilang ne em bad ka NPP.
Haba kren ha ka jingialang paidbah bala iashimbynta da palat 5000 ngut ki nongkyrshan, u Conrad ula ong ba ka Meghalaya mynta kala dei ka Nuksa (Model) ia kiwei ki Jylla ha ka jingpyntreikam ia ka Jal Jeevan Mission (JJM) ban pynpoi um ha manla ki thliew Iing.
“Phi kum ki nongthep vote ka Tura phi la kyrshan ia ka jinglong kyrtong jong nga ha ka elekshon shiteng samoi bad pynjop ruh ia nga da palat 8500 vote.Da ka jingkyrshan jong phi, ngi la lah ban leh shibun ki kam ha kine ki san snem na ka Jylla baroh kawei bad ka Tura ruh kumjuh” ula ong.
“Ha kine ki 45 snem, ki kam pynroi kim shym la wan satia ha Meghalaya. Hynrei hadien ba ngi la ioh thaw sorkar hi ha Jylla, shibun ki kam pynroi kila wan bad ngi la kut jingmut ruh ban trei naka bynta ka roi ka par jong ki paidbah” ula bynrap.
