Agartala, Nohprah 22: U president ka Tripura Pradesh Trinamool Congress u Pijush Kanti Biswas ha ka 21 tarik mynta u bnai u la ong ba ka jingwan iashim bynta jong ki paidbah sha ka prokram ka Trinamool Congress ka pyni ba ki sngi jong ka BJP ki la jan poi sha kaba kut noh.
‘ Ia kane u Biswas ula pynpaw ha ka jingiaid paidnah jong ka Trinamool Congress kaba la long ha Ambassa kana hap hapoh Dhalai district ka Tripura.
“Ka jingwan iashim bynta shitrhem jong kiba bun bah ki samla ha Ambassa ka pyni shai ba ka sorkar BJP kan hap ban mih noh na ka jylla. Ka Trinamool Congress kan long ka nongsaindur na ka bynta ban thaw ia ka sorkar bad Nga ngeit ba ka jingjot ia ka BJP ka la hajan. Ngin thaw ia ka sorkar ha kane ka ilekshon ka ban wan, ” Ong utei u president.
Ka MP Rajya Sabha ka All India Trinamool Congress ka Sushmita Dev kaba la ia don lang ha katei ka prokram ka la ong, “U president ka Tripura Pradesh Trinamool Congress u Pijush Kanti Biswas ula wan mih paw hapdeng jong ngi mynta. Ngi la shim ia ki sienjam ban pynlong ia kane ka rally namar ka jinglong jingman ba la pynlong da ka BJP, kata namar ka jingnangjur ha kaba iadei bad ka jingkyrduh kam kyrduh jam ha ka jylla, kata ka jingkular kina ka BJP kam shym la lah ban pynurlong tad haduh mynta.
Ia ki paidbah la shu pynnor ba kin wan iashim bynta sha ka jingialang jong u Myntri Rangbahduh (PM) ka ri u Narendra Modi. Ka BJP ka la duh bor bad ki nongshong shnong ka Tripura kim kwah ia ka BJP. Nga ngeit kan don ka jingkylla bad ka Trinamool Congress kan thaw ia ka sorkar.
Ha kane ka sngi la pynlong ia ka jingialang hadien ka jingiaid paidbah ha kaba la ia don lang ruh u Rajib Banerjee uba dei u incharge ka Tripura Pradesh Trinamool Congress, u state president ka Tripura Pradesh Trinamool Congress u Pijush Kanti Biswas, ka MP ka All India Trinamool Congress Rajya Sabha ka Sushmita Dev, u president ka pradesh Yuva Trinamool Congress u Santanu Saha bad kiwei pat ki nongialam.
