Shillong, Nailar 09 : Ka Jingjia ha Mukroh kam don jingiadei eiei ruh em bad ka jingiakren pynbeit pud hapdeng ka Jylla Meghalaya bad ka Assam, ong u Bah Thomas Passah, Nongaiktien ka Hynniewtrep Border Dispute Redressal Forum (HBDRF).
Haba iakren bad ki nongthoh khubor ha ka sngi Balang, u Bah Passah ula ong ba ka jingjia ba 22 tarik Naiwieng 2022 ha Mukroh kaba la shim jyndat ia 5 ngut ki mynsiem briew na Meghalaya bad uwei na Assam, kam don jingiadei eiei ruh em bad ka jingiakren pynbeit pud jong ki artylli ki Jylla.
“Ngim kwah ban don ki briew na Assam ki ban ialam bakla lane tuklar bad ka jaka kaba dang hap hapoh u pud u sam jong ka Jylla Meghalaya” ong u Bah Passah.
U Bah Passah ula kdew ba ha kawei na ki jingkren bala pynmih da ka Inquiry Committee, kala kdew ba kane ka jingjia kala jia hapoh ka thain kaba dang hap hapoh ka Jrikyndeng Police Station.
“Mynta, ka jingkylli ka mih ba la ka kyntien Jrikyndeng ka dei ka ktien Assamese ne Karbi” buh jingkylli u Bah Passah.
Ula bynrap ba baroh ki top ba ka kyntien Jrikyndeng ka dei ka ktien Pnar, namar kata ka Mukroh baroh kawei ka dang hap hapoh u pud u sam ka Jylla Meghalaya.
Lah ban kdew hangne, hynriew ngut ki briew kynthup ia 5 ngut na Meghalaya bad uwei u Forest Guard ka Assam, kila kyllon iap ha ka jingther kuli ha Mukroh kaba jia ha ka 22 tarik Naiwieng.
U Myntri Rangbah ka Assam Himanta Biswa Sarwa ula ong ula ong baka jingther kuli ki pulit ha Mukroh ka dei tang ka kam ban iada ialade bad bad iada ia ki nongkynti ka Sorkar haba kam ruh ba kane ka jingjia kala jia ha ka jaka kaba dang hap ha Assam.
Ha kajuh ka por, u Myntri Rangbah ka Jylla Conrad K Sangma ula kam pyrshah ia kane ka jingkam u Himanta Biswa halor ka hok longtrai ia kane ka shnong khappud.
