Shillong, Risaw 11: U Vice Chairman ka Niti Aayog Sumar Kumar Bery ha ka sngi Ba-ar, ula ong ba ka thong jong ka Sorkar Meghalaya ban kot ia ka 10 billion dollar economy ne ka ioh ka kot ba 10 billion dollar, ka dei ka jingangnud ba lah ban kynjoh (aspirational).
“Kumba phi tip ba u Myntri Rangbah Duh u ngeit ba dei tang haba buh ia ka thong ba phin lah ban pynkhlain ia ka rukom treikam…kumta ka 10 billion dollar (economy) ka dei ka jingangnud ba lah ban kynjoh” ong U berry haba iakren bad ki nongthoh khubor hadien ba pyniaid ia ka High Level Meeting ka Niti Aayog, kaba iakren ia ka jingkiew ka ioh ka kot ka Meghalaya hangne ha Shillong.
Ha kane ka jingialang la wan iashimbynta da u Chief Secretary Bah D.P Wahlang, Additional Chief Secretary Dr Shakil P Ahammaeh bad ki Heh Ophisar jong ka Tnad Planning.
U Beryy ula ong ba ka thong jong ka Sorkar Jylla kala ktik bha ban hap iashong bishar bin pa bin.
“Hynrei haba kut ka sngi hi, ka dei ka jingiashimbynta lang jong ki paidbah, ka jingkynshew…ta ka saw ka dei ka thong ba angnud hynrei ka donkam ruh ia shibun ki kam ba hap leh bad kaba donkam ban pyniaid beit iaid ryntih ia baroh ki kam pynroi” ula ong haba bynrap “Namar kata, nga sngew ba kane kam mut la phin poi ne em sha ka thong hynrei ka mut la kan iarap ia phi ha kaban pynkhreh ia ka roadmap (lynti) bad nga ngeit ka long kumta”.
Haba kylli, une u Vice Chairman ka Niti Aayog ula ong “Nga kham kwah ban jubab ia ka jingkylli la ka Meghalaya kala leh bha ne em bad balei ka leh bha bad nga tharai ka pynshaiong ia kaei kaba ka la lah ban leh ha ka liang ka pule puthi, ka umbam umdih…kine ki dei ki jingjop jong ka Meghalaya hynrei watla katta kam shym la khein sting noh ia kane ka bynta bad u Chief Secretary ula pynpaw ba ki dang don shibun ki project kiba la biang nadong hadong ban pyntreikam lada ioh ia ka song pisa”.
Naba ka Ri India kala don ha lynti ban long ka Ri ba lai na kiba riewspah tam ban ban kot ia ka 5 trillion US dollar ha ki san snem ban wan, u Myntri Rangbah ka Jylla Conrad K Sangma ula ong shen ba ha ryngkat bad kane ka jingantad lypa, ka Sorkar Meghalaya kala buh ia ka thong ban pynlong ia ka Jylla ka 10 billion US Dollar economy hapoh u 2028, ka ban pynkiew arshah ia ka GDP ka Jylla.
