Shillong, Iaiong 03 : Ka Iingdorbar Lok Sabha dang shen kala iatai bad mynjur ia artylli ki Bill ba kongsan ba iadei bad ki nongkynti Waqf ; ka Waqf (Amendment) Bill, 2025 bad ka Mussalman Wakf (Repeal) Bill, 2024.
Kine ki Bill ki thmu ban wanrah ia ka jingshai kaba kham bha halor ka rukom pyniaid ia ki nongkynti Waqf katba dang pynbeit ia ki jingkynnoh pyndonkam bakla bad kyntur be-ain.
Kaei ka Waqf ?
Ka Waqf, ka kyntien Arabic, ka thew ia ki jingai sngewbha ia ki nongkynti na ka bynta ki kam bhalang ha ka jingleh niam ha ka niam Islam. Ka jingmut ka sdang naduh ka por jong u Khaliph ba ar, u Hazrat Umar bad ha ka ri India kaba mynta, ki nongkynti jong ka Waqf ki treikam kumjuh kum ki jaka ai jingïarap.
Hynrei kum kine ki jingai sngewbha ki dei ban wan na ka riew shimet, kaba mut ba ym lah ban shu pynlong Waqf ïa ka jaka sorkar ne ka jaka jong uno uno u briew.
Ka Amendment ba thymmai ka thmu ban teh kyndon ba kumno yn pyniaid ia ki jaka jong ka Waqf. Ka sorkar ka pynksan ba ki jingduna kiba la don mynshuwa ki la ailad ban pyndonkam bakla ia ki nongkynti ne pyndonkam na ka bynta ka jingmyntoi ha ka kam khaii ha ka jaka ban ai jingmyntoi ia ka imlang sahlang kaba la thmu. Kawei na ki kyndon ba kongsan ha ka jingpynkylla ka dawa ba shwa ba kano kano ka jaka yn pynbna kum ka Waqf, ka dei ban iaid lyngba ka jingpynshisha da ki District Collector. Kane ka long ban iada na ka jingpynbna beain bad ban pynthikna ba ki jaka paidbah bad ki jaka shimet kin ym shah shim bakla. Ka bill ka buh ruh ia ka rukom bishar bniah kaba shai ban buddien bad pyniaid bha ia ki nongkynti ka Waqf. Katba tang kito kiba bud ia ka niam Islam ki lah ban pyniaid ia ki nongkynti ka Waqf, ki bym dei ki Muslim ki lah ban iashim bynta tang ha ka jingpyniaid kam kiba iadei bad ka jingpeit bniah ia ka pisa tyngka, hynrei ym ha ki kam niam.
Balei ba donkam ia kane ka Ain?
Ka sorkar ka la kdew sha ki katto katne ki khep ha kaba la kynnoh ba la pyndonkam bakla ïa ki aiñ Waqf, da kaba ai nuksa kum ki 123 tylli ki nongkynti ha Delhi’s Lutyens’ Zone ba la pynkylla sha ka Waqf, 400 akar ki jaka temple ha Tamil Nadu ba la pynbna kum ki jaka jong ka Waqf bad 29 hajar tylli ki jaka ka Waqf ba la ai wai ban pyndonkam ha ka kam khaii. Katkum ka jingong jong ka sorkar, kine ki amendment kin iarap ban ioh biang ia kum kine ki jaka bad ban iada na ka jingpyndonkam bakla shuh shuh.
Hynrei ki seng sain pyrthei ba don ha ka Liang Pyrshah, ki la pynrem jur ia katei ka bill, da kaba kynthoh ba ka dei ka jingthmu ban tuklar ia ki jaka lehniam jong ki Muslim. Ki kynnoh ba katei ka bill ka pynmih ia ka jingtieng hapoh ka imlang sahlang bad ba ka sorkar ka thmu ban pynlong sohpdung ia ka Waqf ha ka nam ka jingpynkylla. Haba jubab ia kane, ka sorkar ka la pynskhem ba ka aiñ kam tuklar satia ïa ki bynta ka jinglehniam hynrei ka pynthikna ba ïa ki nongkynti ka Waqf dei ban pyndonkam na ka bynta ki kam lehbha katba la thmu.
U Myntri kam Pohïing u la pynpaw ba kum kine ki jingtieng la pynpaw ha ka por ba ïakren halor ka Citizenship Amendment Act (CAA) bad ka jingpynduh noh ïa ka Article 370, hynrei ym shym la don kano kano ka jingmih kaba sniew kaba la paw kumba la antad da ki nongkynthoh.
Ka Waqf bad ki Schedule Land
Kawei na ki mat ba kongsan bha jong ka Waqf (Amendment) Bill, 2025, ka dei ka jingktah jong ka ia ki jaka Schedule, khamtam ia ki jaka riewlum bad ki jaka ba la iada hapoh ka Fifth bad Sixth Schedule jong ka Riti Synshar ka Ri. Kine ki schedule ki long ban iada ia ka hok jong ki riewlum (ST) bad ban iada ia ka jaka jong ki na ka jingshah pynkylla nongwei ne shah knieh noh ha ki bym dei ki riewlum. Hynrei ki mukotduma kiba la leit noh ki pyni ba teng teng la ju don ka jingpynbna nongkynti ka Waqf ha kum kine ki jaka, kaba la wanrah ia ki jingiakajia halor ka jinglong trai bad ka jingpyniaid.
Ka sorkar ka pynksan ba kane ka bill kan khanglad ïa kino kino ki jingkam nongkynti ka Waqf khlem ka jingbit ha ki jaka Schedule, kaba pynthikna ba ki jaka jong ki jaitbynriew riewlum kin dang ioh ia ka jingïada. Ka jingpynkylla ka bthah ba ki District Collector ki dei ban pynshisha bad mynjur ia kino kino ki jingpynbna thymmai ia ka nongkynti ka Waqf, kaba kan khanglad ia ki jingkam be-aiñ. Kane ka kyndon ka long kaba donkam bha khamtam eh ha ki jylla kum ka Assam, Jharkhand, Chhattisgarh, bad ki bynta jong ka thaiñ Shatei Lammihngi, ha kaba ki jaidbynriew riewlum ki la pynpaw ïa ki jingsngewkhia halor ki Waqf Board kiba kam ia ka jinglong trai halor ki jaka kiba dei jong ki trai ri trai muluk.
Ki la don katto katne ki jingjia kiba la pynmih jingïakynad ha kaba ki Waqf Board ki la kam trai ïa ki jaka Schedule. Ha Telangana, la kam ia ka jaka jong ki riewlum kaba heh 1,700 akar kaba shong dor ₹66,000 klur, katba ha Assam, la iakhun muotduma ia ka jaka kaba heh 134 akar ha Morigaon district kum ka jaka jong ka Waqf. Kum kine ki jingiakajia ki la mih ha ki jylla kum ka Maharashtra bad Karnataka, ha kaba ia ki jaka ba la iada hapoh ki kyndon ka riti synshar la pynbna kum ka nongkynti ka Waqf khlem da pynshisha bha.
Ka sorkar ka la kdew ia kine ki jingjia kum ki nuksa balei ba donkam ban pynkylla ia ka ain ban iada na ka jingwan kyntur beain.
 Bill, 2025 bad ka Mussalman Wakf (Repeal) Bill, 2024.){kind=link}