Tura, Rymphang 18 : U Myntri kam Pohiing ka Ri Amit Shah, ula maham ia ki paidbah ka Jylla khamtam ka Ri-lum Garo ba kin phikir bha ym ban shah pynngop ha ki jingkular ba bun jait jong u Dr Mukul Sangma bad ka Trinamool Congress da kaba ong ba “ka jingai vote ia ka TMC kan dei ka kabu ia ki mynder na Bangladesh ban wan tur sha Jylla bad ka Ri-lum Garo”.
U Amit Shah ula ai ba ka jingaibir ia ka Trinamool kan wanrah tang ia ka jingrung kyrthep ki briew na Bangladesh bad ki paidbah ki dei ban khuslai ia kane ka party na Weng Beangal namar ka Bengal mynta kala mad ia ka jingeh kaba khraw na ka jingwan rung kyrthep ki nongwei na shiliang pud bad kam shym la don ruh ka sienjam ban shim ha kaban pynduna ia kane ka jingwan rung.
U Amit Shah ula kren ia kane ha ka rynsan ialap elekshon ha Garo ha Dalu kaba don ha khappud ka West Garo Hills bad ka Bangladesh. Ka dei ruh ka jaka ba jur eh ka jingialehthma bad ki jaka pynsah ia ki phetwir kiba phet ba Bangladesh ha ka thma iakhun laitluid ka Bangladesh.
U Amit Shah ula ong ba ka jinglong jingman ki jaka bad ki nongshongshnong ka Ri-lum Garo kan sa kylla bak ly bak da ka jingwan rung kyrthep ki briew na Bangladesh lad aka Trinamool ka wan ha ka bor. U ong ba ki paidbah ka Ri-lum Garo kin hap ban phikir bad peitngor bha.
U la ong ruh ba ka roi ka paw kala sah kumjuh la bun snem ha Meghalaya khamtam ka Ri-lum Garo watla kala pynmih ia arngut ki Myntri Rangbah tang ha kine ki 13 snem bala leit. Ula ong ba baroh arngut ki Sangma-Conrad bad Mukul kila pheil ha kaban ialam ia ka Jylla ha ka lynti jong ka roi ka par.
