New Delhi, Nailur 6: Ka G20 dinner invitation ne ka jingkhot bamja lang ia ka President ka Ri India, Draupadi Murmu, kala pynmih ia ka kynrum kynram halor ka jingpyndonkam ia ka kyntien “Bharat” ha ka jaka jong ka “ India”. Katto katne ki pynksan ba ka “Bharat” ka dei ka Kyrteng hok jong ka Ri kat kum ka Riti Synshar ka Ri katba kiwei pat ki ong ba ka dei ka lynti ban pynkhlain ia ka jinglong laitluid ka Ri.
Kumta ka jingkylli ka mih, Kaei kaba ka Article 1 jong ka Riti Synshar ka Ri bad ka Supreme Court ki ong halor kane?.
Kat kum ka Article 1 jong ka Riti Synshar ka Ri, ka “India, kata, Bharat, kan dei ka Union of States.”. Ka long kaba kongsan ban kdew ba ka Article 1 jong ka Riti Synshar ka ithuh ia baroh ar “India” bad “Bharat” kum ki kyrteng hok jong ka Ri.
Ka Iingkashari Supreme Court kala on gruh b aka “India” bad “Bharat” ka dei ka kyrteng hok jong ka Ri. Kane ka jingithuh ka pynthikna ba baroh artylli ki kyrteng ki dei kiba la pdiang bad burom hapoh ki kyndon ain jong ka Ri India.
Ka Iingkashari Supreme Court kala pynwai noh ia ka PIL (Public Interest Litigation) ba kwah ban pynkylla kyrteng na ka “India” sha ka “Bharat” bad kala pyrshah jur ia ka mumotduma ha u Lber 2016. U Chief Justice ha katei ka por Justice TS Thakur bad Justice UU Lalit kila kren shai ia u Nongmudui ba kum kine ki mukotduma yn ym pdiang satia hapoh ka Iingkashari Supreme Court.
Ha katei ka por, u Justice Thakur ula ong “Bharat lne India? Phi kwah ban khot Bharat, iaid beit shakhmat. Lada don kiba kwah ban khot India, ai ba kin khot ka India”.
Ha u 2020, ka Iingkashari Supreme Court kala kyntait ban pdiang ia kum kane ka juh ka mukotduma ba kwah ban pynkylla ia ka kyrteng na ka India sha ka Bharat. Ha katei ka por, kane ka Iingkashari ba hakhlieh duh kala ai jingmut ba ia kane ka jingmudui lah ban pynkylla kum ka jingkyrpad (representation) bad phah sha ka Sorkar Pdeng ba kan shim ia ka rai kaba dei”.
U Chief Justice ka India ha katei ka por u SA Bobde ula ong “Ka Bharat bad India ki dei ki artylli ki kyrteng bala ai ha ka Riti Synshar ka Ri. Ia ka India la khot ruh “Bharat” ha ka Riti Synshar ka Ri”.
Ka jingiatai ba nyngkong eh halor ka “Bharat” bad “India”
Ka jingiatai ba nyngkong eh halor ka Article 1 la buh ban sdang naduh ka 17 tarik Naiwieng, 1948 hynrei halor ka jingai jingmut jong u Govind Ballabh Pant, la pynkynriah noh ia ka jingiatai halor kane ka kyrteng sha kawer pat ka por.
Ia ka jingai jingmut ba khatduh la phah da u Dr BR Ambedkar sha ka Iingdorbar Parliament ha ka 17 tarik Nailur 1949 bad kynthup lang ia ka “Bharat” bad “India”. Hynrei, kiba bun ki dkhot ka Iingdorbar kila pynpaw ba ki pyrshah ia ka jingpyndonkam ia ka kyntien “India” da kaba kdew ba ka long kum ka jingpynkynmaw ia ka jingsynshar ka Ri Bilat.
Don ruh ki dkhot kiba la kdew ba ka India ka dei tang ka kyrteng bujli ia ka Bharat ha ka ktien Phareng.
Lah ruh ban kdew hangne ba ia ka Ri India lah khot ruh kum ka Bharat, Bharata bad Hindustan shuwa ka jingwan synshar ka Ri Bilat.
