Shillong, Naitung 04 : U Nongialam ka BJP bad Myntri Sorkar Bah A.L.Hek ha ka sngi Thohdieng, ula ong ba ka jingpyntrei kam ia kano kano ka ain- la ka dei ka Inner Line Permit (ILP) ne ka Meghalaya Residents, Safety and Security Act (MRSSA)- kim dei satia ban pyndik ia kino kino ki nongshongshnong ka ri.
“Phi lah ban wanrah ia kano kano ka ain-ILP lane MRSSA. Hynrei, baroh ki nongshongshnong ka ri India kim dei ban shah pyndik. Ym dei ban pyndik ia kino kino ruh ki briew. Kane ka dei ka mat kaba shai na nga. Ym dei ban don kiba shah pyndik” ong u Bah Hek haba iakren bad ki nongthoh khubor.
Hynrei ula ong ba ka Sorkar ka dang pynbiang ia ki kam ban pyntre ia ka MRSSA hapoh ka Jylla ban leh eiei halor ki jing sngewbha ia ka jingwan rung kyrthep ki briew ba nabar sha Jylla.
Haba iadei bad ka jingpyntreikam ia ka ILP, u Bah Hek ula ong ba kane ka kam ka dang sahkut ban shim rai da ka Sorkar Pdeng.
Ka Iingdorbar Thaw Ain ka Jylla kala dep mynjur ia ka resolution ha u snem 2019 ba kyrpad ia ka Sorkar Pdeng ban pyntreikam noh ia ka ILP ha Jylla.
U Nongialam ka BJP ula ong ba ka party ha Jylla kan kyrshan ia ka rai jong ka Sorkar Pdeng ban pynthikna ba ia ka ILP la pyntreikam hapoh ka Jylla.
Haba kylli la ka MRSSA ka kham treikam bha ban ia ka ILP, u Bah Hek ula ong ba um dei satia u briew uba lah ban bishar hapdeng kine ki artylli.
“Tad hadien ba ngi la pyntrei, iathuh ia nga kumno ban bishar kano kaba bha bad kaba sniew. Kam lah ban long ban iathuh lypa lada ngim pat pyntreikam ia ki” ula ong.
 ne ka Meghalaya Residents, Safety and Security Act (MRSSA)- kim dei satia ban pyndik ia kino kino ki nongshongshnong ka ri.){kind=link}