Shillong, Naitung 19 : Ka National Education Policy (NEP) 2020 ka pynbiang ia ki lad na ka bynta ka roi ka par jong ka pule puthi ha India. Ka IIM Shillong ka la shim shibun ki sienjam kiba iadei bad ka NEP. Kine harum ki long katto katne kine ki sienjam.
Ka pule puthi ba bun bynta: Ka IIM Shillong ka ngeit skhem ha ka pule puthi kaba bun bynta kaba mut ka rukom treikam kaba pyniasoh shibun ki jingpule, ka jingkyntiew ia ki jingiasoh, ka jingiatreilang bad ka jingpeit ia ki jingmut jingpyrkhat bad ki rukom ai jinghikai bapher bapher. Ka IIM Shillong ka pynthikna ba ki samla pule na ki jingpule bapher bapher ki iasoh bad ka MBA prokram. Ka Admission-2023 ka pyni ba 40% ki samla pule ki dei ki engineer bad 60% kim dei ki engineer hynrei kiba pule ia ka science, humanities, commerce, pharmacy bad kiba la pass ia ki jingpule ai jingsumar.
Ka jinghikai kaba bun lad: Ka jinghikai ha IIM Shillong ka dei kaba bun lad bad kaba plie lad ia ki samla pule ba kin jied ia la ka rukom ioh jinghikai. Man u snem, ki samla pule ki lah ban jied palat 80 tylli ki jingai jinghikai khnang ban pynlong kyrpang ia ka jingioh jinghikai bad ban pynbiang ia ki jingsngewtynnad, ki rukom pdiang ia ka jinghikai bad ki jingthmu jongki ha ki kam ba ki kwah ban trei. Ha ryngkat ki jinghikai ba ki lah ban jied, ki jinghikai ba ki lah ban ioh ki long ha ka – Management Learning from Upanishads and Indian Mythology, Chanakya Arthashastra, Management, and Liberal Arts, Wisdom Leadership: East-West Perspectives and Practices, Music, Aesthesis and Communication for Excellence bad kiwei kiwei. Da kaba ailad ia ki ban jied kumne, ka jingai jinghikai ha IIM Shillong ka kyntiew ia ka jingiashim bynta ki samla pule, ka plie lad ia ka jingsngewthuh kaba kham jylliew ia ki jinghikai bad ka pynkhreh ia ki samla pule ba kin lah ban pynbiang ia ki jingdonkam ha ki jaka trei katkum ka juk mynta.
Ka jingpeit bniah ia ka bor pyrkhat bad ka jingpynbeit ia ki jingeh: Ka community immersion module jong ka IIM Shillong ka dei ka rukom ai jinghikai kaba dang pyrshang kaba kynthup ia ka jingiamir jingmut ki samla pule bad ki thup kiba iahap bad ki jingpule.
Kane ka iaid palat ia ki kamra ai jinghikai bad ka plie lad ia ki ba kin iakren, peit bad iashim bynta ha ka jingim, ki rukom trei bad ki jingeh kiba don ha ka imlang sahlang. Lyngba ka community immersion, ki samla pule ki ioh ia ka jingsngewthuh kaba kham jylliew shaphang ka deiriti, ki jingngeit, ki jingdonkam bad ki bor bad ki kyntiew ia ka bor pyrkhat bad ka jinglah ban pynbeit ia ki jingeh. Kane ka kyntiew ia ka jingsngewlem, ka jingsngewthuh ia ka deiriti bad ka rukom peit kaba kham iar ia ki jingeh ha ka imlang sahlang. Ka plie lad ruh ia ka jingiatreilang bad ki dkhot jong ka imlang sahlang, ki kynhun bapher bapher bad kito kiba don bynta ha ka jingwanrah ia ki jingpynbeit kiba iaineh bad ka jingwanrah ia ki jingkylla kiba bha ha ka imlang sahlang.
Ki prokram online bad ka jingpyniasoh bad ka teknoloji: Katkum ka jingthmu jong ka NEP, ha kaba ki jaka pule ki dei ban ai jingshakri na ka bynta ka jingnang jingstad jong baroh, ka online executive MBA prokram ka dei ka jingai jinghikai ba kyrpang kaba la saindur ban plie lad ia ki samla pule ba kin kyntiew ia ki jingnang jingstad, ki jingtbit bad ka jinglong nongialam lyngba ki kam online.
Kine ki prokram kidei kiba la saindur ban pynbiang ia ki jingdonkam ba kyrpang jong ki ophisar ha kaba ki jinghikai ki long kiba kham halor, kiba iahap bad ki jaka trei bad kiba don ka jingshemphang. Ka IIM Shillong ka pyndonkam ia ki teknoloji, ka multimedia bad ki jingiatreilang lyngba ki lad digital ban plie lad ia ka jingioh jinghikai kaba bha bad ka jingiamir jingmut bad ki para shah hikai bad ki nonghikai.
Ka jingkyntiew ia ka jingwadbniah bad ka jingsaindur thymmai: Ki centre ba kyrpang kum ka Dr APJ Abdul Kalam Centre For Policy Research and Analysis, Centre of Development of North East Region (CeDNER) ki kyntiew ia ka jingwadbniah ha kane ka jaka pule kaba pynshlur ia ki nonghikai bad ki shah hikai ba kin iadon bynta bad ki projek wad bniah, ka jingsaindur thymmai bad ka jingseng kam lajong ha ka thain shatei lammihngi.
Ka pule puthi ia baroh: Ban pynthikna ba baroh ki ioh ia ki lad ka pule puthi kaba bha, ba kynthup ia ki samla pule na ki jaitbynriew ba dang sahdien, lyngba ka jingai jingiarap pisa kaba kot haduh T.1 klur, ka IIM Shillong ka kyrshan ia ki samla pule khnang ba yn ym don mano mano ban duh ia ka lad pule puthi namar ka jingduna pisa.
Ka jingkyntiew ia ki nonghikai: Ka NEP ka batai ia ki rukom treikam khnang ba ki nonghikai kin kham pyntbit ialade, kyntiew ia ki rukom ai jinghikai, iadon bynta ha ki kam wad bniah, iatrei lang bad kito kiba don bynta ha kijuh ki kam, bad don bynta ha ka jingkyntiew ia ka pule puthi ha ka ri. Ka IIM Shillong ka ai shibun ki lad ban kyntiew ia ki nonghikai, lyngba ki jingai jinghikai bad ka jingkyntiew ia ki sap ban kyntiew ia ki rukom ai jinghikai, ki jinglah ban iashimbynta ha ki jingwadbniah bad ka jingiahap bad ki jingtrei.
Ka jingiatrei lang bad ki jaka pule bad ki jaka trei: Ka NEP ka ithuh ia ka bynta jong ka jingiatreilang ki jaka ai jinghikai bad ki jaka trei ban wanrah ia ka jingioh jinghikai kaba pura bad ka jingpynkhreh ia ki samla na ka bynta ki kam ba kin trei.
Ka IIM Shillong ka pynlong shibun ki kam ban wanrah ia ka jingiatreilang ki jaka trei bad ki jaka pule kum ka jingleitjngoh ia ki jaka trei, ka jingai jingkren na ki briew ba khot kyrpang bad ki seminar ha kaba ki riewshemphang na ki jaka trei ki iakren bad ki nonghikai, bad ki ai jingmut na ki jingshem jong ki. Shuh shuh ka jingwanrah ia ki prokjek kiba iadei bad ki jaka trei hapoh ki jingai jinghikai ka wanrah ia ka jingsngewthuh bad ka pyndap ia ki jaka ba suda hapdeng ki jingioh jinghikai bad ki jinglong ha ki jaka trei.
Shuh shuh, ka jingpynlong ia ki jingwad bniah lang, ki jingai jingmut bad ki lad ioh jinghikai shuh shuh kiba iadei bad ki jingdonkam ha ki jaka trei ki pynkhlain shuh shuh ia ki jingiatrei lang. Ka IIM Shillong ka la sdang ia ki prokram MBA bad PhD na ka bynta ki briew kiba la trei khnang ban kyntiew ia ka jingioh jinghikai, kyntiew ia ki lad ioh kam jong ki samla pule, wanrah ia ki jingsaindur thymmai bad wanrah ia ka roi ka par ha ka jaka pule bad ki jaka trei.
Ka National Education Policy (NEP) ka la pynbiang ia ka rukom wanrah jingkylla ha ka pule puthi ha India bad ki jingmyntoi jong kane ki paw ha ki jaka pule ba bha kum ka IIM Shillong.
Lyngba ka NEP, ka IIM Shillong ka la pdiang ia ki sienjam kiba iahap bad ki jingngeit jong ka kum ka pule puthi kaba bun bynta, ka jingai jinghikai kaba bun lad, ka jingiatrei lang hapdeng ki jaka pule bad ki jaka trei bad kiwei kiwei. Kine ki sienjam ki thmu ban pynbiang ia ki samla kiba la tbit ha ki kam, kiba don ki sap, ka jingnang jingstad bad ka rukom pyrkhat kaba donkam ban kiewshaphrang ha ka pyrthei kaba kylla man ka por.
Da kaba pdiang ia ki jingngeit jong ka NEP ha ki rukom ai jinghikai jong ka, ka IIM Shillong ka pynkhreh ia ki samla ba kin long ki nongialam, ki nongsaindur thymmai bad ki nongwanrah ia ka jingkylla kaba bha. Lyngba ka nongrim kaba skhem kaba wan na ka NEP, ka IIM Shillong ka bteng ban don ka bynta kaba khraw ha ka jingkyntiew ia ka pule puthi bad ka jingbha jong ki samla pule ha kane ka jaka kaba aibor ia ki ba kin wanrah ia ka jingkylla kaba bha ha ka imlang sahlang.
