Shillong, K’lyngkot 25 : Haba kynthoh ia u MP ka Congress na Shillong bad President ka MPPC Bah Vincent H Pala, u Vice President ka Meghalaya BJP Wankitbok Pohshna ula ong “Ka Congress kam dei ban batai stad ia ki halor ka jinglaitluid ha ka jingngeit Niam”.
Une u Nongialam ka BJP ula ong ba dei ka Sorkar Congress bala ialam da u Nehru kaba wanrah nyngkong eh ia ka Conversion Bill ia kaba la khot ka Indian conversion (regulation and registration) bill bala wanrah ha Parliament ha u snem 1954, kaba thmu ban ai Licence ia ki Missionaries bad ban pynrung kyrteng ia kiba pynkylla niam bad ki Heh Sorkar.
“Hynrei ia kane ka Bill la kyntait da ka Lower House jong ka Parliament. Kam sngew iahap ba u President ka MPCC um don jingtip ia kane ka jingshisha bad ka pyni ruh ba une u MP u kwah tang ban pynsaphriang ia ki khubor lamler tang ban myntoi ha ka sain pyrthei” ula ong.
U Bah Wankitbok ula ong ba dang shen u PM Modi ula lum lang ia ki Nongialam Khristan jong ka Ri ha ka sngi rakhe Khristmas bad ha ka jingkren jong u, u PM ula iai ban ba ka Khristmas kam dei satia ka jinglehkmen tang jong ki paid Khristan hynrei ka dei jong baroh ki nong India haba iathuh ruh ia ka jingiadei ba iajan jong u bad ki sengniam mynba u dang long u Myntri Rangbah ka Jylla Gujarat bad ha ka jingleit khatduh jong u sha Rome ha u 2021 bad ha ka jingiakynduh ia u Pope Francis,ula khot sngewbha ia u Pope ban wan sha India kum u Nongshah khot sngewbha jong ka Ri.
“Kam don satia kano kano ka jingartatien ba baroh ki flagshop program bala wanrah da ka Sorkar u Modi, kala ai ia kajuh ka hok ia ki paid Khristan kaba pyni shai ruh ba ka BJP ka dei ia baroh ki nong India hapoh ka slogan ‘sabka saath sabka vikas sabka prayas sabka vishwas” ula ong.
U Bah Wankitbok ula ong “U Heh ka Congress ha Jylla ha ka jaka ban pynsaphriang ia ki khubor thok, ula dei ban ai shuwa ia ka kaiphod jingtreikam ha ka Constigtuency kum u MP ka Shillong ha ka jaka ban leh politics da ki kam shukor tang ban khring vote na ka bynta ka elekshon Lok Sabha.
Ula ong ba u MP ka Shillong u dei ban tip ba ka Jylla Meghalaya kaba don buh eh ki paid Khristan kala ioh ia baroh ki skhim ka Sorkar Pdeng la ka dei ka jingpynpoi kor um haman ki iing lyngba ka JJM, ka jingshna iing lyngba ka PMAY, ka gas connecton hapoh ka Ujwala, ka jingsam khaw ei hapoh ka PMGKY bad kaba kham kongsan eh ka jingai injek dawai covid ei, kaba pyllait ia ki nongshnong ka Jylla n aka khlam kaba shyrkhei eh.
