Kohima, Rymphang 24 :Da kaba kynthoh pyrshah ia ka seng Congress, u Myntri Rangbahduh (PM) Narendra Modi mynta ka sngi 24 tarik u la ong ba kane ka party ba la rim bah ka la lute noh ia ka pisa kaba thmu na ka bynta ka thain shatei lammihngi (Northeast).
U Modi u la kynnoh ruh ia ka Congress halor ka jingleh bym salia halor ki mat kiba iadei bad ka Nagaland bad mynta kane ka party ka la ioh ia la ka bainong namar ki kam bymman kiba ka la leh.Ia kane u Modi u la pynpaw haba aijingkren ha ka jingialang paidbah ha Chumoukedima, Nagaland.
Nalor kata u Modi u la kam ruh ba ka Congress ka la leh bym salia ha kaba iadei bad ka jingangnud jong ka jylla Nagaland bad ha ka por ka jingsynshar jong kane ka party kam shym la don satia ka shongsuk shongsain hapoh ka jylla.
Haba kren halor ka roi ka par, u PM Modi u la ong ba mynta la sakhi ia ka jingkiew jong ka roi ka par bad ka jingshaniah ha ka jylla bad ba ka BJP kan dang iai bteng ban leh kumjuh.
Haba kynthoh ia ka seng Congress, u Modi u la ong ba kane ka party ka la shim ia ka thain Northeast kum ka AT|M, hynrei watla katta, ka sorkar ba la ialam da ka BJP ka la pynkylla ia kane ka jinglong jingman bad mynta kane ka jylla ka la iaid ha ka lynti jong ka roi ka par.
Ha kajuh ka por u Modi u la ai ruh ka jingiaroh ia u Myntri ka Nagaland u Temjen Imna Along halor ka jingpyniatylli ia ki nongshong shnong bad ban mihkhmat ia ka thain Northeast.
Haba kren halor ka phang kaba iadei bad ka jingpyntreikam ia ka ain Armed Forces (Special Powers) Act (AFSPA), u PM Modi u la ong ba ia kane ka ain kaba aibor kyrpang ia ki shipai la dep ban weng noh na kiba bun ki jaka, bad na ka liang ka sorkar ka dang bishar bniah khnang ba kin lah ban weng noh syndon ia kane ka ain AFSPA na kane ka thain hi baroh kawei.
Shuh shuh u Modi ula kam ba ka BJP ka la lah ban pynkylla pat ia ki polisi jong ka jingpyniapait jong ka seng Congress sha ka polisi kaba khuid bad kala don ruh ka jingkiew shaphrang ha kaba iadei bad ka jingpyniasoh ia ki lynti surok, lynti rel bad liengsuin nalor ki kam karkhana hapoh kane ka thain.
Kumjuh u PM Modi u la ong ba un pynurlong ia ka jingkular kaba u la khlei sha ki paidbah nongshong shnong ka Nagaland.
