Nongstoiñ, Jylliew 26: Ka West Khasi Hills District, lyngba ka ophis jong ka District Social Welfare Officer (DSWO) Nongstoiñ, ha ka jingïatreilang bad ka District Sankalp Hub for Empowerment of Women (DHEW), ka Beti Bachao Beti Padhao (BBBP) Awareness Programme bad ka Theo Rehabilitation Centre Langumshing, ka la pynlong ïa ka jingïalang kyrpang ban rakhe ïa ka International Day Against Drug Abuse and Illicit Trafficking ha Anderson Higher Secondary School, Nongstoiñ.
La sdang ïa ka jingïalang da ka jingkren pdiang sngewbha da ka kong D. Pakynteiñ, District Social Welfare Officer (DSWO), kaba la pynshai shaphang ki jingsniew kiba wan na ka jingpyndonkam Drok. Ka la kyntu jur ïa ki samla ba kin long kiba husïar bad ban lait na ka jingkyrni ha ka jingdih pynbuaid.
U Bah B.D. Marak, MPS, Superintendent of Police, West Khasi Hills, u ba long u kongsan ha kane ka jingïalang, u la ai mynsiem ïa ki samla ban lait na ka jingdih drok bad u la pynkynmaw ba kane ka long ka jingeh kaba ktah ïa ka pyrthei bad wat ha Nongstoiñ ruh. U la ong ruh ba ka jingkhlaiñ ka mon bad ka bor jabieng, ka jingshim rai hok bad ka jingpyrkhat sani ki long ki lad ban lait na ka jingma bapher bapher ha ka imlang sahlang.
Ka kong I. Shadap, Clinical Psychologist na ka ophis jong ka District Medical & Health Officer (DMHO) Nongstoiñ, ka la ai jingkren halor ki daw kiba pynlong ïa ki briew ban sdang pyndonkam drok bad ki lad ban ïoh jingïarap na ka bynta ka jingpynkhiah bad jingkoit jingkhiah.
Ka kong E.Wanniang, Gender Specialist na ka DHEW, ka la pynshai shaphang ka thong jong ka Beti Bachao Beti Padhao Scheme bad kumno ka kyntiew bad ai bor ïa ki kynthei bad ki khynnah kynthei ha ka imlang sahlang.
Ha kane ka sngi, la don ruh ka jingïashim bynta jong ki briew na ka Theo Rehabilitation Centre, kiba la phla shem mynsiem halor ki jingngop ha ki jingdih ba sniew bad kumno ban ïaleh pyrshah ïa kita ki jingeh bad jop ïa ki.
La don ruh ka jingshad, ka jingpule ïa ka jingkular pyrshah ïa ka jingdih drok, ka jingai khusnam sha kiba jop ha ka slogan bad poster competition, jingïakop shna dur khih kiba lyngkot halor ki jingma jong ka jingdih drok bud sa da ka ka jingthung dieng kum ka dak jong ka jingkyrmen.
La pynkut ïa ka jingïalang da ka jingai khublei kyrpang da ka kong D. Wahlang, Director jong ka Theo Rehabilitation Centre.
 Nongstoiñ, ha ka jingïatreilang bad ka District Sankalp Hub for Empowerment of Women (DHEW), ka Beti Bachao Beti Padhao (BBBP) Awareness Programme bad ka Theo Rehabilitation Centre Langumshing, ka la pynlong ïa ka jingïalang kyrpang ban rakhe ïa ka International Day Against Drug Abuse and Illicit Trafficking ha Anderson Higher Secondary School, Nongstoiñ.){kind=link}