Shillong, Lber 10: Ka Bharatiya Janata Party (BJP)-Meghalaya, kan iai bteng ban buddien iaka jingdawa pyntreikam ia ka Inner Line Permit (ILP) bad ban pynrung iaka ktien Khasi bad Garo hapoh ka khyrnit ba phra jong ka riti synshar ka ri India watla ki paidbah ki khlem ailad ia ka Party ba kan ioh thaw ne ialam iaka sorkar Meghalaya.
Ia kane la pynpaw u Nongialam ka BJP bad Myntri ka Tnad Animal Husbandry and Veterinary bah A.L Hek haba iakren bad ki lad pathai khubor.
U Bah Hek ula pynpaw ba ka BJP kan iatreilang bad ka Sorkar Meghalaya Democratic Alliance (MDA 2.0) ban iai pynbor iaka sorkar pdeng ban pynurlong iaki jingdawa ka jylla.
“Ki paidbah ka jylla ki khlem ailad iaka BJP ban thaw ne ialam iaka sorkar Meghalaya hynrei watla kata naka liang ka Party kan iai buddien bad ka sorkar pdeng halor ka jingdawa ILP bad ban ioh jingithuh iaka ktien Khasi bad Garo hapoh ka khyrnit ba phra ka riti synshar ka ri India namar ka Party ka sngewthuh iaka jingangnud ki paidbah nong shong shnong ka jylla” la ong u bah Hek.
U bah Hek ula ong ruh ba kum ka Party kaba don lang hapoh ka sorkar MDA, kan pynbor iaka sorkar jylla ban pynurlong ia ki katto katne ki mat baka BJP ka bsuh hapoh ka Manifesto naka bynta ka jingmyntoi ki paidbah ka jylla.
Ula ong ba ka BJP kan kyrshan ia kaei kaei kaba ka ka sorkar MDA ba ialam daka NPP ka shim naka bynta ka bha ka miat ki paidbah hynrei kan long ba peitngor ruh ban pynthikna ba kino kino ki rai ba ka sorkar ka shim kim dei ban ktah iaka bha ka miat jong u paidbah.
