Agartala, Rymphang 16: U Myntri Rangbah (CM) ka Tripura u Manik Saha u la pyndep ia ka jingleit thep vote hapoh Tulsibati Higher Secondary school ha Agartala mynta ka sngi Palei.
U Saha u la ia aireng ha kane ka ilekshon assembly ha ka jylla napoh Town Bordowali constituency.Haba kren sha ki lad pathai khubor hadien ba la pyndep ia ka jingthep vote, u CM Manik Saha u la ong; “Ka BJP kan lah ban leh kham bha shuh shuh ban ia kaba la dep bad shispah percent Nga thikna ba ka BJP kan ioh ia ka jingbun paid ha kane ka ilekshon.
Ki ba bun ki paidbah nongthep vote la iohi ba kila ieng ha u lain uba jrong ha ki polling station naduh ka or 5:30 mynstep.Na ka bynta ka jingiaid beit bad ban pynneh ia ka suk ka sain ha ka jingpynlong ia kane ka ilekshon la pynjur ia ka jingpahara ha baroh ki jaka.
Baroh ki don 3,337 tylli ki polling station ha baroh kawei ka jylla.Ki don baroh 28.13 lak ki nongthep vote kaba kynthup ia 13.53 lak ki kynthei ki ban ai ia ka rai na ka bynta ka jop ka rem jong ki 259 ngut ki kyrtong ha kaba 20 ngut na ki, ki dei ki kynthei ha kane ka ilekshon ha Tripura.Ka jingdon jong ki nongwan thep vote kat haduh ka por 9 baje mynstep ka long 13.92 percent.
