Guwahati, Naiwieng 26 :U President ka Assam Pradesh Congress Committee (APCC) u Bhupen Bora hynnin ka sngi Thohdieng ula ong ba ka sorkar BJP ba la lamkhmat da u Myntri Rangbah (CM) Himanta Biswa Sarma kala pulom ban weng ia ki jingeh kiba iadei bad ki kam iakajia pud ha ki jylla ka thain shatei lammihngi (Northeast).
“Ka BJP kala pulom ban tehlakam ha kaba iadei bad ka jinglong jingman ha ka jylla bad ruh km shym la lah ban weng ia ki jingeh kiba iadei bad ki kam iakajia pud,” ong u Bora haba aijingkren sha ki lad pathai khubor ha Nagaon.
Haba pynpaw ha kaba iadei bad ki jingiaid paidbah ne ”Bharat Jodo Yatra”, ula ong ba shibun bah ki paidbah kila aijingkyrshan ia ki bad kila wan iashim bynta shitrhem ha kane ka jingiaid kaba long ruh ka sakhi ba ka jingsynshar jong ka BJP hapoh Assam kala poi sha kaba kut.
“Ka BJP kala pulom ban pynurlong ia ki kular ki jong ka na ka bynta ki paidbah nongshong shnong ka Assam,” ula ong shuh shuh.
Une u president ka APCC ula kynnoh ruh ia ka sorkar Assam halor ka jingpynkylla kam sain hima ne politics lyngba ki briew kiba duk bad ong ba ha ka jaka ban weng ia ki jingeh bad ki jylla kiba marjan, ka BJP kala nang pynmih pynban ia ki jingeh bad nang pynsniew shuh shuh ia ka jinglong jingman.
Da kaba kynthoh pyrshah ia u Myntri Rangbah (CM) ka Assam u Himanta Biswa Sarma, u Bhupen Bora ula ong ba une u CM shisien ula kular ban pynioh bording khlem kano kano ka jingsiew pisa na ka bynta kiba duk ba rangli.Hynrei, mynta ha ka jaka ban pynioh ia kane ka bording, ka sorkar jong u kala nangkyntiew ia ka bai bording kaba la pynlong ia ki briew kiba duk ba kin shem jingeh ban pyndonkam ia ka bording.
U Bhupen Bora ula don ha Nagaon ban iashim bynta ha ka Bharat Jodo Yatra kaba la sdang na Dhubri hapoh Assam.
