Shillong, Iaiong 07 : Ka jingjia aksiden kaba jia ha Jaiaw Langsning ha ka sngi Saitjain, kala kylla long ka mat ia khana ha kylleng ka Sor khamtam hadien ka jingsaphriang ka video CCTV ba ioh ring ia ka jingjia.
Kat kum ka video la iohi ba ka Hyundai Creta kala knieh tam shakhmat ia kawei ka kali bad ioh tynrah ia ka thuk thuk Yamaha FZ, haduh ba u nongniah kane ka thuk thuk ula her sha suin.
Wat hapdeng ka jingjam ka jingiatynrah, u nongniah ka thuk thuk ula shu mynsaw malu mala.
Hynrei, hadien kane ka jingjia, ka jingkylli ka mih haba shem ba kane ka kali Hyundai Creta ka dei kaba tah iit iong, kaba la khang pyrshah da ka Iingkashari Supreme Court naduh u snem 2012.
Kaba nang pynsha-iong ka long ba kane ka Hyundai Creta ka dei kaba don u nombor ML0-05-Z-6714 bad kat kum ki record jong ka Regional Transport Office (RTO), une u nombor u dei uba la register ia kawei ka Yamaha Cygnus Ray ZR (kali ar shaka) ba long trai da u Banshanlang Majaw.
Haba kylli, ki Pulit kila kyntait ban ai kano kano ka jingkynthoh da kaba ong b aka jingtohkit ka dang iaid shakhmat ban lap ia ka jingshisha baroh ha lyndet kane ka jingaksiden.
Ki nongshongshnong ka Shillong ki kwah ban tip halor ka jinglong trai ia kane ka kali Hyundai Creta ba tah iit iong bad balei ba ka pyndonkam ia u nombor jong ka thuk thuk.
